Лінкі ўнівэрсальнага доступу

Пуцін заявіў, што спадзяецца на палітычную сьпеласьць беларускага народу


Пуцін на сэсіі Рады калектыўнай бясьпекі АДКБ у рэжыме відэаканфэрэнцыі.

Расея занепакоеная умяшаньнем звонку ва ўнутраныя справы Беларусі, спадзяецца на тое, што народ краіны зможа самастойна вырашыць усе ўнутрыпалітычныя пытаньні, заявіў прэзыдэнт РФ Уладзімір Пуцін, інфармуе Інтэрфакс.

«Непакоіць ўмяшаньне звонку: фінансавае падсілкоўваньне, інфармацыйнае суправаджэньне, палітычная падтрымка і гэтак далей. Трэба даць народам магчымасьць самім разабрацца з пытаньнямі, якія ўяўляюць для іх цікавасьць», — сказаў Пуцін на сэсіі Рады калектыўнай бясьпекі АДКБ у рэжыме відэаканфэрэнцыі.

Ён падкрэсьліў, што зьнешняе ўмяшаньне заўсёды тлумачаць лепшым намерамі. «А, як вядома, добрымі намерамі выбрукаваная дарога ў пекла. Вось да чаго вядуць добрыя намеры, умяшаньня ў справы іншых дзяржаў», — дадаў Пуцін.

«Я вельмі спадзяюся на тое, што беларускаму народу хопіць палітычнай сьпеласьці, каб спакойна, без усялякіх рэзкіх рухаў, выбудаваць дыялёг з усімі палітычнымі сіламі, і вырашыць усе свае ўнутраныя пытаньні самім, без усякага ціску і ўмяшаньня звонку», — сказаў прэзыдэнт Расеі.

Ён дадаў, што «не сумняваецца ў тым, што гэта атрымаецца, у тым ліку маючы на ўвазе палітычны вопыт прэзыдэнта Беларусі».

Пуцін адзначыў, што ў перадвыбарнай сытуацыі «даволі часта ўзьнікаюць розныя рухі, канфлікты», гэта нармальная сытуацыя, аднак зьнешняга ўмяшаньня быць не павінна.

Раней Пуцін ужо ня раз рабіў аналягічныя заявы пра недапушчальнасьць вонкавага ўмяшаньня ў сытуацыю ў Беларусі, у тым ліку і ў жніўні 2020 году.

Таксама ў жніўні Пуцін заяўляў, што паводле ягонага загаду ў Расеі сфармаваная рэзэрва сілавікоў для перакідваньня ў Беларусь на дапамогу мясцовым сілам правапарадку.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG