Лінкі ўнівэрсальнага доступу

Карпянкоў стаў намесьнікам міністра ўнутраных спраў — камандзірам унутраных войскаў

абноўлена

Сьлавікі разганяюць нядзельны пратэст у Менску на Нямізе, 23 верасьня. Кіраўнік ГУБАзіК Мікалай Карпянкоў — у цэнтры.

Лукашэнка прызначыў палкоўніка міліцыі Мікалая Карпянкова намесьнікам міністра ўнутраных спраў — камандзірам унутраных войскаў.

Раней Карпянкоў узначальваў Галоўнае ўпраўленьне барацьбы з арганізаванай злачыннасьцю і карупцыяй.

ГУБАЗіК актыўна ўдзельнічаў у жорсткіх разгонах мірных акцый пратэсту. Палкоўнік Карпянкоў асабіста браў удзел у вулічных «апэрацыях», разьбіў шкляныя дзьверы кавярні, дзе хаваліся пратэстоўцы.

Ранейшага камандзіра ўнутраных войскаў Юрыя Назаранку Лукашэнка павысіў да першага намесьніка міністра.

Да сёньня першым намесьнікам міністра быў Генадзь Казакевіч — начальнік крымінальнай міліцыі.

Юры Назаранка скончыў беларускую вайсковую вучэльню, пасьля быў разьмеркаваны ў 1-ю роту спэцыяльнага прызначэньня ў той самай вайсковай частцы 3214, дзе служыў у 1997–2007 гадах. Па заканчэньні навучаньня ў Вайсковай акадэміі быў першым намесьнікам камандзіра вайсковай часткі 5526 у Берасьці. Пазьней, у 2010–2014 гадах, працаваў у Службе бясьпекі прэзыдэнта, потым служыў камандзірам у Спэцыяльным атрадзе хуткага рэагаваньня. Ад 2018 году кіраваў штабам Службы бясьпекі прэзыдэнта. З 2019-га камандаваў унутранымі войскамі.

Лукашэнка сказаў, што правёў ратацыю сілавікоў, бо цяпер для міліцыі галоўны кірунак — грамадзкая бясьпека.

«Сутнасьць цяперашніх прызначэньняў і перастановак у тым, што мы надаём большае значэньне ў МУС сыстэме грамадзкай бясьпекі. Вы, пэўна, гэта заўважылі. Тут ніхто не павінен быць у крыўдзе з ранейшых намесьнікаў, асабліва першага: няма таго, што мы не давяраем камусьці. Проста, зыходзячы з нашага досьведу, сытуацыі ў краіне, апошніх падзей, мы пераконваемся і разумеем, што і ў будучыні грамадзкая бясьпека будзе найважнейшым кірункам работы для нашай міліцыі. Вось і ўсе сакрэты. Каб тут не капаліся і ня думалі, што мы нейкі пераварот робім», — сказаў Лукашэнка.

Гэта ўжо трэцяя перастаноўка сілавікоў пасьля прэзыдэнцкіх выбараў.

Тры тыдні таму Лукашэнка прызначыў міністрам унутраных спраў Івана Кубракова (замест Юрыя Караева). А начальнікам менскай міліцыі — Міхаіла Грыба (замест Кубракова).

На пачатку восені, 3 верасьня, Лукашэнка памяняў кіраўнікоў КДБ, Савету бясьпекі, КДК і Менгарвыканкаму.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG