Прадстаўніцтва ЭЗ у Беларусі заявіла, што тлумачэньне, якім Менск абгрунтаваў высылку двух брытанскіх дыпляматаў на гэтым тыдні, неапраўданае.
Паводле прадстаўніцтва, брытанскія дыпляматы выконвалі звычайныя заданьні і не рабілі дзеяньняў, несумяшчальных з дыпляматычным статусам.
«Высылка двух брытанскіх дыпляматаў — яшчэ адзін прыкры і непрымальны крок беларускіх уладаў. Яму папярэднічала ў мінулым месяцы „просьба“, каб Польшча і Літва адклікалі сваіх амбасадараў і рэзка абмежавалі сваю дыпляматычную прысутнасьць у Беларусі. Гэтыя дзеяньні яшчэ больш ізалююць беларускія ўлады і не спрыяюць захаваньню адкрытых каналаў камунікацыі», — гаворыцца ў заяве дыпляматычнай місіі ЭЗ у Менску.
Міністэрства замежных спраў Беларусі 9 лістапада абвясьціла persona non grata вайсковага аташэ Тымаці Ўайта і намесьніцу амбасадара Лізу Тамвуд з амбасады Вялікай Брытаніі ў Менску.
У адказ Лёндан вырашыў выслаць зь Вялікай Брытаніі дадому двух беларускіх дыпляматаў.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў