Лінкі ўнівэрсальнага доступу

Зьнешні гандаль — мінус 17,7%. Чаго дасягнула беларуская эканоміка


Спыненьне АЭС, рост даўгоў і іншыя «посьпехі» ўладаў пасьля выбараў.

Зьнешні гандаль прасеў на 8 мільярдаў даляраў

За восем месяцаў гэтага году зьнешнегандлёвы таваразварот скараціўся на 17,7% і склаў 44,7 мільярда рублёў. Зьмяншэньне — амаль на 8 мільярдаў даляраў. Экспарт зь Беларусі зьнізіўся на 16,2% і склаў 22,9 мільярда. Зьмяншэньне — на 3,7 мільярда.

Са жніўня даўгі арганізацый вырасьлі на 2,6%

Адна з праблем беларускай эканомікі — закрэдытаванасьць прадпрыемстваў. На сёньня даўгі арганізацый складаюць 59,8 мільярда рублёў. З пачатку году даўгі вырасьлі амаль на 10%, а з жніўня — на 2,6%.

Мінус 447 мільёнаў даляраў укладаў

Пасьля жніўня беларусы пачалі масава забіраць грошы з банкаў. На верасень, па статыстыцы Нацбанку, на ўкладах было 4,9 мільярда даляраў. У параўнаньні з жніўнем гэтая лічба скарацілася на 447 мільёнаў даляраў. То бок беларусы забралі з укладаў амаль паўмільярда.

Скараціліся і рублёвыя дэпазыты — на 215 мільёнаў са жніўня па верасень.

Прыбытак прамысловых гігантаў падае

Са студзеня па верасень прамысловы гігант БелАЗ зарабіў 15,9 мільёна рублёў. Гэта ў 13 разоў меней, чым за такі ж пэрыяд у мінулым годзе.

15,5 мільёна рублёў са студзеня па верасень зарабіў МТЗ, або ўтрая меней, чым за такі ж пэрыяд летась.

34 тысячы рублёў са студзеня па верасень зарабіў Беларускі мэталюргічны завод. Летась прыбытак за такі самы пэрыяд быў яшчэ меншы — 17 тысяч рублёў.

Курс даляра вырас на 4%

9 жніўня, у дзень выбараў, курс даляра быў 2,44. А цяпер, паводле Нацбанку, курс 2,55. Даляр падаражэў за гэты час на 11 капеек, або на 4%. І гэта з улікам таго, што ўжо некалькі дзён курс даляра зьніжаецца.

Дзярждоўг вырас на 3,7 мільярда ад часу выбараў

На 1 жніўня гэтага году дзяржаўны доўг Беларусі складаў 53,1 мільярда рублёў, а па інфармацыі на 1 кастрычніка — ужо 56,9 мільярда. То бок вырас на 3,7 мільярда з часу выбараў.

З пачатку ж году дзярждоўг вырас на 12,2 мільярда рублёў.

19% арганізацый — стратныя

Паводле Белстату, у Беларусі цяпер 19,1% арганізацый стратныя. У мінулым годзе такіх было толькі 15%. Стратнымі за гэты час зрабіліся 275 арганізацый.

І тут яшчэ АЭС

Беларуская АЭС пасьля ўрачыстага адкрыцьця папрацавала 2 дні. Пасьля яна спынілася, бо зьявіліся «праблемы з электратэхнічным вымяральным абсталяваньнем». Калі запусьціцца — пакуль не вядома. Што праўда, экспэрты кажуць: «Фінансавых стратаў такое спыненьне не нясе».

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG