Міністар замежных спраў Вялікай Брытаніі Домінік Рааб заклікаў правесьці ў Беларусі новыя прэзыдэнцкія выбары. Гэта адбылося пасьля публікацыі незалежнай справаздачы, якая пацьвердзіла, што жнівеньскія выбары былі «сфальсыфікаваныя», і раскрыла маштабы парушэньняў правоў чалавека, зробленых рэжымам Лукашэнкі.
Вялікая Брытанія ўзначаліла дыпляматычную кампанію ў справе міжнароднага незалежнага расьсьледаваньня ў рамках АБСЭ паведамленьняў пра фальсыфікацыі падчас прэзыдэнцкіх выбараў, а таксама кампаніі гвалту, запалохваньня і перасьледу мірных дэманстрантаў уладамі Беларусі.
Вялікая Брытанія, — гаворыцца на сайце Міністэрства замежных спраў Аб’яднанага Каралеўства, — раней выказвала заклапочанасьць з нагоды правядзеньня выбараў і жудасных рэпрэсій, якія адбыліся ўсьлед за імі. У верасьні Вялікая Брытанія ўвяла эпахальныя санкцыі супраць Аляксандра Лукашэнкі, яго сына і высокапастаўленых асоб ва ўрадзе Беларусі ў адпаведнасьці з новым рэжымам брытанскіх санкцый у адказ на катаваньні і жорсткае абыходжаньне з сотнямі мірных дэманстрантаў, якiя ўтрымлiваюцца пад вартай.
Міністар замежных спраў Домінік Рааб сказаў:
«Мы настойвалі на правядзеньні гэтага незалежнага расьсьледаваньня, і яно выявіла фальсыфікацыю, якая ляжыць у аснове прэзыдэнцкіх выбараў, і подлыя дзеяньні, учыненыя рэжымам Лукашэнкі, каб здушыць беларускі народ.
Цяпер павінны быць арганізаваныя новыя свабодныя і справядлівыя выбары, а вінаватыя ў гвалце супраць дэманстрантаў павінны быць прыцягнутыя да адказнасьці».
Вялікая Брытанія разам з 16 міжнароднымі партнэрамі ў верасьні задзейнічала «Маскоўскі мэханізм» у Арганізацыі бясьпекі і супрацоўніцтва ў Эўропе (АБСЭ), у выніку чаго незалежны дакладчык па правах чалавека пачаў расьсьледаваньне фальсыфікацый на выбарах і грубага парушэньня правоў грамадзян.
Незалежнае расьсьледаваньне АБСЭ прыйшло да высновы, што існуюць неабвержныя доказы таго, што:
- Выбары былі сфальсыфікаваныя
- Улады Беларусі рабілі масавыя і сыстэматычныя парушэньні правоў чалавека ў адказ на мірныя дэманстрацыі і пратэсты
- У краіне пануе атмасфэра беспакаранасьці, і ніхто ня быў прыцягнуты да адказнасьці за катаваньні і бесчалавечнае абыходжаньне з боку сілаў бясьпекі
- Свабода СМІ і бясьпека журналістаў няспынна зазнаюць напады з боку беларускага рэжыму
Вялікая Брытанія асуджае спробы беларускага рэжыму падарваць незалежнае расьсьледаваньне, у тым ліку яго адмову супрацоўнічаць зь місіяй для ўстанаўленьня фактаў або забарону місіі ўехаць у Беларусь. Мы настойліва заклікаем Беларусь, гаворыцца ў заяве брытанскага МЗС, адмяніць сваё рашэньне і канструктыўна супрацоўнічаць з АБСЭ.
Вялікая Брытанія працягне працаваць зь міжнароднымі саюзьнікамі для абароны дэмакратыі, свабоды СМІ і правоў чалавека ў Беларусі. Вялікая Брытанія падтрымлівае рэкамэндацыі справаздачы АБСЭ і заклікае ўрад Беларусі правесьці новыя прэзыдэнцкія выбары, неадкладна спыніць гвалт, вызваліць усіх несправядліва затрыманых, расьсьледаваць заявы аб катаваньнях і прыняць меры для забесьпячэньня гуманных умоваў утрыманьня пад вартай.
- У склад ініцыятараў незалежнай экспэртнай групы ў рамках «Маскоўскага мэханізму» ўваходзяць Эстонія, Латвія, Літва, ЗША, Вялікая Брытанія, Францыя, Данія, Фінляндыя, Ісьляндыя, Нарвэгія, Польшча, Нідэрлянды, Канада, Бэльгія, Славаччына, Чэхія і Румынія. Яны ініцыявалі расьсьледаваньне 17 верасьня.
- «Маскоўскі мэханізм» дазваляе групам дзяржаў-удзельніц АБСЭ ініцыяваць місіі экспэртаў для паведамленьня пра сур’ёзныя праблемы з правамі чалавека.
