Лінкі ўнівэрсальнага доступу

Рэдактара «Нашай нівы» прызналі вінаватым ва ўдзеле ў несакцыянаванай акцыі і пакаралі штрафам


Ягор Марціновіч у судзе

У Менску прайшоў суд над рэдактарам «Нашай нівы» Ягорам Марціновічам. У 12:15 разгляд справы быў скончаны, у 13 гадзін быў агучаны вырак.

Суд Заводзкага раёна Менска прызнаў Ягора Марціновіча вінаватым ва ўдзеле ў несанкцыянаваным шэсьці на праспэкце Пушкіна 11 верасьня. Яго пакаралі штрафам памерам 15 базавых велічынь (405 рублёў).​

Паводле пратаколу, Марціновіч нібыта ўдзельнічаў у шэсьці 11 жніўня з 2.45 да 3.05 і выкрыкваў лёзунгі «Жыве Беларусь», «Патрабуем перамен». Марціновіч жа кажа, што ў акцыях ня ўдзельнічаў.

Марціновіч на судзе расказаў, што ўдзень 11 жніўня працаваў на вуліцах Менску ў якасьці журналіста. Позна ўвечары таго дня ён знаходзіўся ў раёне гандлёвага цэнтру «Рыга», пасьля адвёз на Кальварыйскую вуліцу калегу Зьмітра Панкаўца і паехаў у раён станцыі мэтро «Пушкінская», каб забраць іншую калегу Настасьсю Роўду.

Марціновіч быў там у раёне 1:45 ночы. На месцы ён убачыў вялікую колькасьць сілавікоў. Яны спынілі машыну Марціновіча, вывелі яго зь яе, праверылі багажнік і мабільны тэлефон, пасьля чаго адпусьцілі. Але на скрыжаваньні Пушкіна і Матусевіча аўтамабіль Марціновіча зноў спынілі.


«Сілавік навёў аўтамат на мяне і загадаў выйсьці. Ён парадаваўся, што я журналіст. Сказаў, што тым больш павінен мяне затрымаць. Пасьля чаго пацягнуў мяне за руку ў аўтазак. Мая машына засталася стаяць пасярод дваровага праезду з адчыненымі дзьвярамі», — расказаў Марціновіч.

Марціновіча адвезьлі спачатку ў турму на Акрэсціна, потым у Заводзкі РУУС. Там ён правёў каля 9 гадзін ва ўнутраным двары. На яго склалі пратакол за ўдзел у мітынгу, Марціновіч зь ім не пагадзіўся. Пасьля яго адвезьлі ў жодзінскае СІЗА, адкуль вызвалілі 12 жніўня паводле «інструкцыі зь міністэрства».

«Мяне з Жодзіна забіраў чалавек, які прадставіўся як Артур, гэта быў супрацоўнік цэнтральнага апарату МУС. Мяне адвезьлі ў Менск у будынак цэнтральнага апарату. Сказалі, што я вызвалены імем Рэспублікі Беларусь на асабісты загад міністра Караева.

Мне сказалі, што калі я ня буду расказваць пра акалічнасьці свайго затрыманьня, то справа аб адміністрацыйным правапарушэньні ня будзе працягнутая. Я адмовіўся».

Разгляд справы скончаны

У 12:15 разгляд справы Ягора Марціновіча скончаны. Сьведкай абвінавачваньня выступіў участковы інспэктар Канстанцін Савеня. Ён расказаў, што у ноч з 10 на 11 жніўня працаваў на праспэкце Пушкіна ў цывільнай вопратцы і бачыў, як Марціновіч браў удзел у несанкцыянаванай акцыі і выкрыкваў лёзунгі «Жыве Беларусь» і «Патрабуем перамен». На большасьць пытаньняў Марціновіча і яго адваката Зікрацкага сьведка ня змог адказаць, спаслаўшыся на даўнасьць. Участковага дапытвалі праз скайп. Пад канец разгляду сам Марціновіч выказаў упэўненасьць у палітычным характары яго справы.

Ягор Марціновіч застаецца падазраваным у яшчэ адной справе — аб паклёпе

На мінулым тыдні Ягор Марціновіч правёў трое содняў за кратамі паводле іншай крымінальнай справы — за паклёп. 23 верасьня ў яго дома правялі ператрус.

17 жніўня «Наша ніва» апублікавала інтэрвію з адным з дыджэяў, якія ўключылі 6 жніўня падчас афіцыйнага мерапрыемства ў Кіеўскім сквэры Менску песьню Віктара Цоя «Перемен». Улад Сакалоўскі расказаў журналістам, што ў ізалятары на Акрэсьціна яго біў чалавек, падобны да намесьніка кіраўніка МУС Аляксандра Барсукова.

Улад Сакалоўскі зьехаў зь Беларусі, бо, як казаў, атрымліваў пагрозы пасьля публікацыі таго інтэрвію.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG