Лінкі ўнівэрсальнага доступу

У Менску прайшоў Жаночы марш, удзельніц якога захоплівалі сілавікі ў балаклавах. Каля сотні затрыманых

Свой суботні марш жыхаркі Менска назвалі рэпэтыцыяй «народнай інаўгурацыі» Сьвятланы Ціханоўскай.


Жаночы марш у Менску,  рэпэтыцыя «народнай інаўгурацыі» Сьвятланы Ціханоўскай, 26 верасьня 2020 году.

Мэтро і наземны грамадзкі транспарт не спыняюцца на плошчы Перамогі ў Менску

Тут перш плянавалі сабрацца жаччыны на свой традыцыйны суботні марш пратэсту. У ваколіцах плошчаў Перамогі і Якуба Коласа заўважаныя АМАП і аўтазакі.

Суботні марш жыхаркі Менску прымеркавалі да рэпэтыцыі «народнай інаўгурацыі» Сьвятланы Ціханоўскай

«Усім надакучлівы былы — больш нелігітымны! — гаворыцца ў звароце. — Запрашаем правесьці рэпэтыцыю інаўгурацыі ў гонар ўступленьня на пасаду Сьвятланы Ціханоўскай. Давайце пакажам, хто наш прэзыдэнт!». Спачатку збор быў заплянаваны а 14-й гадзіне на плошчы Перамогі. Але калі туды падцягнуліся сілавікі, месца было апэратыўна зьмененае — пляцоўка перад Камароўскім рынкам.

Горадня. Перад пачаткам маршу пад чырвона-зялёнымі сьцягамі каля філярмоніі людзі ў цывільным схапілі хлопца, які крычаў «Жыве Беларусь».

Менск, міліцыянты падышлі да журналістаў, якія працуюць на маршы жанчын, і просяць, каб яны трымаліся на адлегласьці ад сілавікоў.

Прыйшла Ніна Багінская са сьцягам

На пляцоўку каля Камароўскага рынка ў Менску прыйшла Ніна Багінская са сьцягам. Жанчыны зьбіраюцца групамі і крычаць «Ніна! Ніна, наш герой!» Дзяўчаты нясуць партрэты Ціханоўскай, кветкі.

Прыехалі аўтобусы зь сілавікамі

Менск. На пляцоўку побач з Камароўскім рынкам прыехалі два шэрыя аднолькавыя аўтобусы з зацемненымі шыбамі і два сінія. Міліцыя кажа людзям праз мэгафоны, што сход недазволены.

Пачаліся затрыманьні

7 аўтобусаў па ходніках рушылі да рэстарацыі «Лідо» і гандлёвага цэнтру «Люстэрка», дзе сабраліся каля сотні жанчын. Сілавікі без апазнавальных знакаў у аліўкавай форме выйшлі з аўтобусаў, пачаліся затрыманьні. Хапаюць груба, адну жанчыну пацягнулі за рукі і ногі.

Сілавікі без апазнавальных знакаў багуць за жанчынамі на Камароўку

Затрымалі каля 10 жанчын з кветкамі, — перадае карэспандэнт Свабоды. Іншыя жанчыны разышліся, схаваліся ў тым ліку на Камароўскім рынку. Сілавікі без апазнавальных знакаў пабеглі за імі, але там іх не злавілі. Вяртаюцца ў свае аўтобусы.

Затрыманых зьвезлі

Аўтобусы з затрыманымі зьехалі ад Камароўскага рынку. На вуліцы Харужай засталіся некалькі дзясяткаў жанчын, у тым ліку Ніна Багінская са сьцягам і некалькі дзясяткаў іншых, яны гутараць з журналістамі.

Машыны сілавікоў на „Жаночым маршы“
Машыны сілавікоў на „Жаночым маршы“

Затрымалі Багінскую

Сілавікі без апазнавальных знакаў зноў пачалі затрыманьні. Ніну Багінскую забралі ў сіні мікрааўтобус.

Невядомы ў масцы і зялёнай форме без апазнавальных знакаў забірае сьцяг Ніны Багінскай сёньня на Камароўцы
Невядомы ў масцы і зялёнай форме без апазнавальных знакаў забірае сьцяг Ніны Багінскай сёньня на Камароўцы

Аўтобус зь Нінай Багінскай адʼехаў. Людзі крычаць «Ганьба!» — паведамляе карэспандэнт Свабоды ад Камароўскага рынку ў Менску.

Мікрааўтобусы паехалі да рэстарацыі «Лідо», сілавікі кантралююць тэрыторыю, каб ніхто больш не сабраўся. Пляцоўка перад Камароўскім рынкам апусьцела, перадае карэспандэнт Свабоды.

Як піша Tut.by, гэты мужчына абурыўся тым, што людзі ў масках без апазнавальных знакаў затрымліваюць людзей. У выніку яго затрымалі.

Каля сотні жанчын з кветкамі ад Камароўкі ідуць на праспэкт Незалежнасьці. Крычаць «Далучайся!», пляскаюць у далоні, паведамляе карэспандэнт Свабоды.

Каля гандлёвага цэнтру «Імпульс» усіх заблякавалі сілавікі ў балаклавах, хапаюць і цягнуць у мікрааўтобусы. Тут каля 20 бусікаў зь сілавікамі ў балаклавах, паведамляе карэспандэнт Свабоды.

Затрымалі дзьвюх журналістак

На Камароўцы затрымалі карэспандэнтку «Эўрарадыё» Юлію Матузаву. Перад затрыманьнем у як праверылі акрэдытацыю — і затрымалі, нягледзячы на тое, што акрэдытацыя дзейная, а журналістка мела пасьведчаньне і камізэльку «Прэса».

Таксама затрымалі журналістку Белсату Марыю Грыц.

Пасьля 10 хвілінаў знаходжаньня ў міліцэйскай машыне журналістку Юлію Матузаву вызвалілі. Міліцыянт у форме і ў масцы «дазволіў» ёй працаваць далей, піша БАЖ.

На «Жаночым маршы» дзясяткі затрыманых

Затрыманыя дзясяткі жанчын, паведамляе карэспандэнт Свабоды. Сярод затрыманых былая кіраўніца прытулку для ахвяраў хатняга гвалту «Радзіслава» Вольга Габрунова і ЛГБТ-актывістка Віка Біран.

На пляцоўцы каля гандлёвага цэнтру «Імпульс» яшчэ застаюцца некалькі дзясяткаў жанчын.

Сілавікі хапаюць таксама выпадковых мінакоў. «Што мы вам зрабілі?» — скандуюць жанчыны.

Ніну Багінскую адпусьцілі

Жанчыны зноў сабраліся і пайшлі па праспэкце Незалежнасьці

Нягледзячы на затрыманьні, на праспэкт Незалежнасьці ў Менску ў раёне плошчы Якуба Коласа выйшлі некалькі соцень жанчын, да іх далучылася вялікая група, якая стаяла ля Інстытуту фізкультуры.

Жанчыны сфармавалі калёну, усклалі нацыянальныя сьцягі на плечы, паднялі бел-чырвона-белыя парасоны і пайшлі па ходніках праспэкту Незалежнасьці. Тут сабраліся некалькі соцень жанчын, далучаюцца новыя людзі. Машыны сыгналяць на знак падтрымкі.

Зноў пачаліся затрыманьні, адна дзяўчына страціла прытомнасьць

Калёна жанчын разьвярнулася і вяртаецца назад на плошчу Якуба Коласа, але іх дагналі сілавікі ў балаклавах, яны прыехалі ў 7 аўтобусах. Зноў пачаліся затрыманьні. Валакуць за рукі і ногі, не пускаюць схавацца ў падземным пераходзе.

Каля рэстарацыі «Лідо» ў Менску ўпала дзяўчына, страціла на нейкі час прытомнасьць. Ёй дапамагаюць мэдыкі.

На праспэкт Незалежнасьці ў раёне плошчы Якуба Коласа прыехала яшчэ тры аўтазакі і шэсьць мікрааўтобусаў зь сілавікамі.

„Жаночы марш“ зноў ідзе на Якуба Коласа

У калёне засталіся сто чалавек, жанчыны зноў ідуць на плошчу Якуба Коласа, дасталі бел-чырвона-белыя сьцягі і парасоны.

Жанчыны на плошчы Якуба Коласа праз падземны пераход дайшлі ля філярмоніі, там знаходзіцца яшчэ адна група.

Невядомыя ў масках і зялёнай форме без апазнавальных знакаў зносяць жанчын каля ЦУМу ў Менску.

Загрузіць яшчэ

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG