Лінкі ўнівэрсальнага доступу

«Хуліганства — гэта ўдзел у арганізацыі афіцыйнага мерапрыемства». Судзяць гукарэжысэра Кірыла Галанава


Уладзіслаў Сакалоўскі і Кірыл Галанаў

Працэс праходзіў у судзе Цэнтральнага раёну. Галанава абвінавачвалі ў непадпарадкаваньні міліцыі і дробным хуліганстве.

Кірыла Галанава судзілі ў адзін час з Уладзіславам Сакалоўскім, працэсы праходзілі адначасова на розных паверхах будынку суду. Абвінавачаных на працэс не прывозілі, разгляд справы адбываўся праз скайп.

«6 жніўня каля 19.00, знаходзячыся на вуліцы Кахоўскай у прысутнасьці вялікай колькасьці людзей сьвядома сарваў правядзеньне заплянаванага сьвяточнага канцэрту, — гаворыцца ў першым пратаколе, складзеным на Галанава. — Уключыў музыкальную кампазыцыю, якая не адпавядала фармату праведзенага мерапрыемства. На заўвагі не рэагаваў. Чым праявіў яўную непавагу да грамадзтва».

Паводле іншага пратаколу, Кірыл Галанаў падчас затрыманьня аказаў непадпарадкаваньне супрацоўнікам міліцыі.

«Спрабаваў уцякаць, — агучыла пратакол судзьдзя. — Хапаўся за форменную вопратку».

Прадстаўніца аб'яднанага штабу Марыя Калесьнікава прыехала на суд над Кірылам Галанавым і Уладзіславам Сакалоўскім
Прадстаўніца аб'яднанага штабу Марыя Калесьнікава прыехала на суд над Кірылам Галанавым і Уладзіславам Сакалоўскім

Кірыл Галанаў пагадзіўся зь першым пратаколам, зьмест другога назваў хлусьнёй.

«Я працаваў на мерапрыемстве ля кінатэатру „Кіеў“, — расказаў Кірыл Галанаў у судзе. — Ставілі гук. Там было мерапрыемства, арганізаванае для таго, каб сарваць мітынг Сьвятланы Ціханосўкай. Мне было гэта максымальна непрыемна. Я паведаміў пра гэта кіраўніцтву Палацу моладзі. Пазваніў дырэктарцы асабіста і ад нас дваіх расказаў, што не хачу працаваць там. Што магу патрываць адзін дзень, але потым хачу ўзяць адгулы за свой кошт. Альбо ўвогуле звольніцца. Дырэктарка папрасіла пачакаць, не гарачыцца. Мне не праблема працаваць, я магу працаваць суткамі. Мне праблема такімі бруднымі рэчамі займацца».

Па словах Кірыла Галанава, песьню гурта «Кіно» яны з напарнікам спампавалі з інтэрнэту.

«Спампавалі, чакалі зручнага моманту, каб яе ўключыць, — расказаў на судзе Галанаў. — Па сваіх асабістых перакананьнях мы былі павінны знаходзіцца сярод людзей, якія туды прыйшлі. А не сярод арганізатараў. Калі мы ўключылі песьню, ніхто зь людзей не прасіў яе выключыць, не было заўваг. Потым зьявіліся людзі ў гарнітурах і не папрасілі выключыць музыку, а пачалі вырываць шнуры з апаратуры... Я прызнаю, што займаўся хуліганствам. Але хуліганствам я займаўся тым чынам, што ўдзельнічаў у арганізацыі афіцыйнага мерапрыемства».

Падчас дачы паказаньняў Кірыл Галанаў яшчэ раз расказаў, што не супраціўляўся падчас затрыманьня. Прысуд у справе Галанава будзе агучаны пазьней.

Маці Ўладзіслава Сакалоўскага (справа) і начальніца штабу кандыдаткі ў прэзыдэнты Беларусі Сьвятланы Ціханоўскай Марыя Мароз
Маці Ўладзіслава Сакалоўскага (справа) і начальніца штабу кандыдаткі ў прэзыдэнты Беларусі Сьвятланы Ціханоўскай Марыя Мароз

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG