Лінкі ўнівэрсальнага доступу

Анархіст Паліенка выйшаў на волю пасьля сухой галадоўкі. Міліцыя сьцьвярджае, што ён не галадаў

абноўлена

Зьміцер Паліенка, архіўнае фота
Зьміцер Паліенка, архіўнае фота

Аб 11 гадзіне 25 ліпеня зь менскага ізалятара на Акрэсьціна выйшаў на волю актывіст анархісцкага руху, былы палітвязень Зьміцер Паліенка. Ён сьцьвярджае, што з 15 сутак адміністрацыйнага арышту 6 першых дзён трымаў сухую галадоўку пратэсту.

«Хачу распавесьці, што творыцца ў цэнтры ізаляцыі правапарушальнікаў, — кажа Зьміцер Паліенка Свабодзе. — Там цяпер вельмі жорстка, упершыню з такім сустракаюся. Палітычных арыштантаў беспрычынна трымаюць у карцэрах, не даюць матрацаў, робяць усё, каб пасварыць простых арыштантаў з палітычнымі, вады ў карцэры няма, трэба кожны раз прасіць.

Зразумеў, гэта ўсё робіцца на адмысловы загад зьверху, а шараговыя супрацоўнікі ізалятару ставяцца да нас нават прыязна, бывае, што і нейкія просьбы выконваюць. І яшчэ зь іх размоваў можна меркаваць, што большасьць нэгатыўна ставяцца да Лукашэнкі, ім гэты рэжым таксама надакучыў».

Зьмітра Паліенку затрымалі 8 ліпеня пасьля таго, як на сваёй старонцы ў Facebook выказаўся ў падтрымку палітвязьняў. Суд адбыўся яшчэ праз два дні, але Зьміцер Паліенка мяркуе, што ягоная справа была сфальшаваная.

«Міліцыянты зьмясьцілі ў маю справу нейкія здымкі нібыта праведзенай мной акцыі, хаця я знаходжуся на хатняй хіміі і ў акцыях удзелу ня мог браць. Сфальшавалі справу, толькі б мяне пасадзіць. Відаць, быў загад ізаляваць, як іншых палітвязьняў», — мяркуе Паліенка.

Зь яго словаў, на яго склалі яшчэ як мінімум два пратаколы. Таксама актывіста апытвалі міліцыянты з Маскоўскага РУУС паводле крымінальнай справы, заведзенай за зьнявагу супрацоўнікаў міліцыі ў Ганцавічах. Які статус Зьміцер Паліенка мае ў гэтай крымінальнай справе, яму не паведамілі.

Зьміцер Паліенка і цяпер адбывае пакараньне па крымінальнай справе. 25 кастрычніка 2019 году суд прызнаў яго вінаватым у «асабліва злосным хуліганстве» (ч. 3 арт. 339 КК) і прысудзіў 3 гады абмежаваньня волі без накіраваньня ў папраўчую ўстанову.

МУС сьцьвярджае, што галадоўкі не было

Паводле прэс-сакратаркі Міністэрства ўнутраных справаў Беларусі Вольгі Чамаданавай, Паліенка не трымаў галадоўку. У размове са Свабодай 25 ліпеня яна спаслалася на відэа з камэры, якое пацьвярджае яе словы і якое ў міліцыі вырашылі не публікаваць з «этычных прычынаў».

Тое ж яна раней сьцьвярджала ў Telegram,​ апублікаваўшы відэа, на якім чалавек у форме перадае ежу і газэты ў дзьверы камэры.

Севярынец перадаў, калі выйдзе на волю

Некалькі дзён Зьміцер Паліенка сядзеў у карцары побач з карцарам, дзе знаходзіўся Павал Севярынец — і яны перагаворваліся праз сьцяну.

«Павал трымаецца, перадаваў усім прывітаньне і словы «Жыве Беларусь». Сказаў, што вызваліць яго мусяць 21 жніўня, а 16 гадзіне. Пра сябе перадаваў, што пачуваецца нармальна», — распавёў Паліенка.

Што важна ведаць пра справу Паліенкі

Зьміцер Паліенка на судзе спрабаваў ускрыць сабе вены як пратэст супраць закрытага працэсу. Працэс пагадзіліся адкрыць
Зьміцер Паліенка на судзе спрабаваў ускрыць сабе вены як пратэст супраць закрытага працэсу. Працэс пагадзіліся адкрыць

Зьмітра Паліенку затрымалі 20 сакавіка за тое, што ён распыліў газавы балёнчык у твар мужчыну, які нібыта зрабіў яму заўвагу за курэньне на лесьвічнай пляцоўцы (сам Паліенка казаў, што скарыстаў балёнчык у мэтах самаабароны — толькі тады, калі на яго напаў п'яны мужчына).

Пазьней сьледчыя прадʼявілі яму яшчэ некалькі крымінальных абвінавачаньняў:

  • «Псаваньне маёмасьці ў грамадзкім месцы» — за графіці на Ахоцкай вуліцы ў Менску (арт. 341).
  • «Публічная абраза прадстаўніка ўлады ў сувязі з выкананьнем ім службовых абавязкаў» — за словы на адрас былога міністра ўнутраных спраў Ігара Шуневіча (арт. 369).
  • «Асабліва злоснае хуліганства» — за графіці «Міліцыянты забіваюць людзей» на будынку ў Заводзкім раёне Менску (ч. 3 арт. 339).
  • «Распальваньне сацыяльнай варожасьці» (ч. 1 арт. 130).

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG