Лінкі ўнівэрсальнага доступу

У Менску за графіці затрымалі 45-гадовага супрацоўніка банку. Міліцыя кажа, што надпіс быў «абразьлівы»


ГУУС Менгарвыканкаму паведаміла 23 ліпеня пра затрыманьне двух чалавек за спробу нанесьці графіці. Адзін зь іх аказаўся 45-гадовым работнікам банку.

Паводле міліцыі, каля 23.00 дзяжурным Фрунзэнскага РУУС патэлефанавалі з паведамленьнем пра тое, што невядомы пад мостам наносіць «надпісы на плітках і слупах». Затрымалі «даволі сабе дарослага», як піша ГУУС, 45-гадовага работніка аднаго зь менскіх банкаў.

Ён кажа, што выехаў катацца на ровары, меў з сабой фарбу, «зрабіў некаторыя надпісы» на трох слупах і на дарозе, але «выбраў няслушны спосаб прыцягненьня ўвагі» — маўляў, больш так ня будзе. Што за надпісы былі, міліцыя не паведамляе, але называе іх «абразьлівымі».

Супраць яго завялі крымінальную справу паводле арт. 341 КК — «апаганьваньне пабудоваў і псаваньне маёмасьці», вінаватаму пагражае штраф або арышт.

Другога згаданага міліцыяй чалавека затрымалі 20 ліпеня каля 2.30 ночы Дэпартамэнтам аховы МУС у Цэнтральным раёне Менску, калі рабіў надпісы на пешаходнай дарожцы на Даўгінаўскім тракце. Гэта аказаўся беспрацоўны 35-гадовы мужчына.

На відэа ён тлумачыць, што ён добрапрыстойны грамадзянін і ня бачыць супярэчаньняў гэтаму ў сваіх дзеяньнях — маўляў, хацеў «выказаць сваю думку», па-іншаму не атрымліваецца.

На яго склалі пратаколы за «дробнае хуліганства» (арт.17.1 КаАП) і «непадпарадкаваньне законнаму патрабаваньню» (арт. 23.4 КаАП), суд пакараў яго 10 днямі арышту.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG