На гэты момант дзьверы ў студыю, якую блогер наймаў у гатэлі «Кастрычніцкі», зачыненыя, але не апячатаныя. Учора пасьля першага ператрусу яны былі расчыненыя насьцеж.
Супрацоўнікі гатэля кажуць, што вобшук праводзілі больш за 5 чалавек, але нічога не выносілі.
Таксама 4 чэрвеня прайшоў ператрус у кватэры маці Сяргея Ціханоўскага ў Гомлі. Перад гэтым суткі абшуквалі лецішча маці Ціханоўскага.
Першы ператрус у студыі Ціханоўскага правялі 3 чэрвеня. Паводле супрацоўнікаў гатэля, ён адбываўся ад самага ранку і да 16-й гадзіны.
«Прыйшлі два міліцыянты ў форме, зь імі быў адзін у цывільным і яшчэ двое невядомых, — можа, гэта былі панятыя. Таксама было некалькі супрацоўнікаў МНС — яны і ўзламалі дзьверы, старыя, драўляныя. Што так доўга можна было тут рабіць — незразумела. Пасьля вобшуку выносілі скрыні зь нечым, тэчкі з дакумэнтамі. Што забралі — невядома. Здаецца, са студыі зьнік кававы апарат», — патлумачылі супрацоўнікі гатэля.
Пасьля першага ператрусу памяшканьне не апячаталі, дзьверы пакінулі наросьцеж.
Затрыманьні Ціханоўскага і яго прыхільнікаў у Горадні. Што трэба ведаць
- Сяргей Ціханоўскі — відэаблогер, аўтар Youtube-каналу «Страна для жизни». Зьбіраўся балятавацца ў прэзыдэнты на выбарах 2020 году, але ягонай ініцыятыўнай групе адмовілі ў рэгістрацыі, калі ён быў у зьняволеньні. Але зарэгістравалі групу ягонай жонкі Сьвятланы Ціханоўскай, блогер стаў кіраўніком гэтай групы.
- У Горадні а 20-й гадзіне 29 траўня Сяргея Ціханоўскага затрымалі супрацоўнікі АМАПУ падчас перадвыбарчага пікету за вылучэньне ў прэзыдэнты ягонай жонкі. Абставіны затрыманьня нагадвалі тыя, пра якія раней казаў Лукашэнка.
- Гэта адбылося пасьля таго, як невядомая жанчына, якую сьведкі называлі правакатаркай, кідалася на блогера і спрабавала трымаць яго за вопратку. Яна патрабавала, каб Ціханоўскі адказаў, чаму ў Горадні няма яго жонкі. Ціханоўскі намагаўся сысьці ад жанчыны — зьявілася міліцыя.
- Літаральна праз паўхвіліны прыбеглі супрацоўнікі АМАП і затрымалі Сяргея Ціханоўскага, які знаходзіўся за некалькіх мэтраў ад эпіцэнтру. Пазьней затрымалі таксама шэраг паплечнікаў Ціханоўскага. МУС паведаміла пра крымінальную справу за «гвалт супраць міліцыянтаў».
- На лецішчы Ціханоўскага нібыта знайшлі 900 тысяч даляраў. Жонка мяркуе, грошы маглі падкінуць.
- Ціханоўскага трымаюць за кратамі з 29 траўня 2020 году. Яго абвінавачваюць паводле чатырох артыкулаў Крымінальнага кодэксу:
ч. 1 арт. 293 (арганізацыя масавых беспарадкаў, да 15 гадоў зьняволеньня).
ч. 3 арт. 130 (распальваньне сацыяльнай варожасьці);
ч. 2 арт. 191 (перашкода працы ЦВК). Заяву на яго падала старшыня ЦВК Лідзія Ярмошына;
ч. 1 арт. 342 (арганізацыя дзеяньняў, што груба парушаюць грамадзкі парадак).
- Беларускія праваабаронцы прызналі Ціханоўскага палітычным зьняволеным.
- ПА АБСЭ і Эўрапарлямэнт патрабавалі вызваленьня Ціханоўскага, Статкевіча і іх паплечнікаў.
