Лінкі ўнівэрсальнага доступу

Затрыманага блогера Ціханоўскага і яго паплечнікаў перавялі ў менскі сьледчы ізалятар

абноўлена

Сяргей Ціханоўскі, архіўнае фота

Жонка затрыманага блогера Сяргея Ціханоўскага кажа, што ейны муж у СІЗА на Валадарскага, там яму прынялі перадачу.

УЖЫВУЮ Выбары-2020. Як праходзіць прэзыдэнцкая кампанія падчас пандэміі

Днём раней Сьвятлана Ціханоўская прывезла мужу перадачу ў менскі ізалятар часовага ўтрыманьня на Акрэсьціна, але там ёй сказалі, што Сяргей Ціханоўскі ў СІЗА № 1 на Валадарскага. А ў СІЗА ёй заявілі, што такі да іх не паступаў. Сьледчыя не адказваюць на тэлефанаваньні.

Ператрусу ў Ціханоўскіх пакуль не было. Адвакат даў падпіску аб неразгалошваньні матэрыялаў справы.

Праваабарончы цэнтар «Вясна» адзначае: днём 2 чэрвеня стала вядома, што на Валадарскага перавезены Вяргілій Ушак, 3 чэрвеня — што там жа Яўген Разьнічэнка і Аляксандар Арановіч. Днём раней таксама стала вядома, што з горадзенскага ізалятара на Акрэсьціна перавялі Арцёма Сакава. Лёс астатніх пакуль высьвятляецца.

Адвакат Зьмітра Фурманава кажа, што супрацоўнікі МУС зьбівалі затрыманага. Вяргілій Ушак у зьняволеньні абвясьціў галадоўку.

Каго і ў чым менавіта вінавацяць, невядома дагэтуль.

Як расказала дзяўчына затрыманага Сяргея Калмыкова Ірына Федарэнка, ад дзяржаўнага адваката яна даведалася, што ейнага хлопца перавялі ў СІЗА на Валадарскага.

Напярэдадні ў іхняй найманай кватэры ў Горадні, а таксама ў бабулі Сяргея ў Мастоўскім раёне былі ператрусы. З ордэру на ператрус Ірына даведалася, што Калмыкоў — падазраваны ў крымінальнай справе па ч. 3 арт. 364 Крымінальнага кодэксу.

Саму Федарэнку выклікалі на допыт у Сьледчы камітэт як сьведку 3 чэрвеня. Зь ейных слоў, на допыце, які доўжыўся больш за 2 гадзіны, яна падрабязна расказвала пра тое, што яны зь Сяргеем рабілі 29 траўня. На допыце да яе ставіліся нармальна, зьвярнулі ўвагу на тое, што напярэдадні яна давала інтэрвію мэдыя.

Затрыманьні Ціханоўскага і яго прыхільнікаў у Горадні. Што трэба ведаць

  • Сяргей Ціханоўскі — відэаблогер, аўтар Youtube-каналу «Страна для жизни». Зьбіраўся балятавацца ў прэзыдэнты на выбарах 2020 году, але ягонай ініцыятыўнай групе адмовілі ў рэгістрацыі, калі ён быў у зьняволеньні. Але зарэгістравалі групу ягонай жонкі Сьвятланы Ціханоўскай, блогер стаў кіраўніком гэтай групы.
  • У Горадні а 20-й гадзіне 29 траўня Сяргея Ціханоўскага затрымалі супрацоўнікі АМАПУ падчас перадвыбарчага пікету за вылучэньне ў прэзыдэнты ягонай жонкі. Абставіны затрыманьня нагадвалі тыя, пра якія раней казаў Лукашэнка.
  • Гэта адбылося пасьля таго, як невядомая жанчына, якую сьведкі называлі правакатаркай, кідалася на блогера і спрабавала трымаць яго за вопратку. Яна патрабавала, каб Ціханоўскі адказаў, чаму ў Горадні няма яго жонкі. Ціханоўскі намагаўся сысьці ад жанчыны — зьявілася міліцыя.

Пахвілінна. Як адбылося затрыманьне Ціханоўскага ў Горадні >>

  • У Twitter-акаўнце Ціханоўскага «Страна для жизни» зьявілася відэа, на якім бачна, як мужчына ў скураной куртцы, падчас мітусьні на пікеце ў Горадні, дапамагае легчы на зямлю чалавеку ў міліцэйскай форме.
  • Літаральна праз паўхвіліны прыбеглі супрацоўнікі АМАП і затрымалі Сяргея Ціханоўскага, які знаходзіўся ў некалькіх мэтрах ад эпіцэнтру. Пазьней затрымалі таксама шэраг паплечнікаў Ціханоўскага. МУС паведаміў пра крымінальную справу за «гвалт супраць міліцыянтаў».
  • Ціханоўскага маюць трымаць за кратамі прынамсі да дня прэзыдэнцкіх выбараў.
  • Вядома пра наступных затрыманых у «справе Ціханоўскага»:
  1. Сяргей Ціханоўскі
  2. Яўген Разьнічэнка
  3. Зьміцер Фурманаў
  4. Уладзімер Навумік
  5. Вяргілій Ушак
  6. Аляксандар Арановіч
  7. Васіль Баброўскі
  8. Арцём Сакаў
  9. Уладзімер Кніга

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG