Лінкі ўнівэрсальнага доступу

Горадзенскага актывіста, які пайшоў падтрымаць Ціханоўскага пад будынкам міліцыі, завезьлі ў шпіталь з пастарунку 


Мікола Салянік (справа) і Сяргей Ціханоўскі на пікеце 29 траўня ў Горадні

Гарадзенца Міколу Саляніка затрымалі пад будынкам УУС Горадзенскага аблвыканкаму ранкам 30 траўня.

Як паведамляе сайт «Народнай грамады», яго пратрымалі больш за тры гадзіны ў Ленінскім РАУС Горадні. Паводле Саляніка, яму стала дрэнна, прыйшлося выклікаць хуткую дапамогу, мэдыкі канстатавалі, гіпэртанічны крыз і яго адвезьлі ў гарадзкую бальніцу № 4 у суправаджэньні капітана і сяржанта міліцыі, якія цяпер знаходзяцца ў калідоры і ахоўваюць ягоную палату.

Мікола Салянік выступаў з прамовай падчас збору подпісаў ініцыятыўнай групай Сьвятланы Ціханоўскай у Горадні. Пасьля затрыманьня Сяргея Ціханоўскага ён пайшоў разам зь іншымі гарадзенцамі пад будынак Упраўленьня ўнутраных спраў, каб даведацца пра лёс блогера. Каля 21:30 ён прапанаваў усім прысутным разысьціся, каб іхні сход не расцанілі як незаконнае пікетаваньне.

Салянік — інвалід ІІ групы. Ён вядомы сваімі пэрформансамі: ладзіў акцыі ў турэмнай робе, заклейваў сабе рот скотчам падчас судовага паседжаньня, прыкоўваў сябе кайданкамі да баляс у судзе, ладзіў пахаваньне Канстытуцыі Беларусі.

Затрыманьні Ціханоўскага і яго прыхільнікаў у Горадні. Што трэба ведаць

  • Сяргей Ціханоўскі — відэаблогер, аўтар Youtube-каналу «Страна для жизни». Зьбіраўся балятавацца ў прэзыдэнты на выбарах 2020 году, але ягонай ініцыятыўнай групе адмовілі ў рэгістрацыі, калі ён быў у зьняволеньні. Але зарэгістравалі групу ягонай жонкі Сьвятланы Ціханоўскай, блогер стаў кіраўніком гэтай групы.
  • У Горадні а 20-й гадзіне 29 траўня Сяргея Ціханоўскага затрымалі супрацоўнікі АМАПУ падчас перадвыбарчага пікету за вылучэньне ў прэзыдэнты ягонай жонкі. Абставіны затрыманьня нагадвалі тыя, пра якія раней казаў Лукашэнка.
  • Гэта адбылося пасьля таго, як невядомая жанчына, якую сьведкі называлі правакатаркай, кідалася на блогера і спрабавала трымаць яго за вопратку. Яна патрабавала, каб Ціханоўскі адказаў, чаму ў Горадні няма яго жонкі. Ціханоўскі намагаўся сысьці ад жанчыны — зьявілася міліцыя.

Пахвілінна. Як адбылося затрыманьне Ціханоўскага ў Горадні >>

  • У Twitter-акаўнце Ціханоўскага «Страна для жизни» зьявілася відэа, на якім бачна, як мужчына ў скураной куртцы, падчас мітусьні на пікеце ў Горадні, дапамагае легчы на зямлю чалавеку ў міліцэйскай форме.
  • Літаральна праз паўхвіліны прыбеглі супрацоўнікі АМАП і затрымалі Сяргея Ціханоўскага, які знаходзіўся ў некалькіх мэтрах ад эпіцэнтру. Пазьней затрымалі таксама шэраг паплечнікаў Ціханоўскага. МУС паведаміў пра крымінальную справу за «гвалт супраць міліцыянтаў».
  • Ціханоўскага маюць трымаць за кратамі прынамсі да дня прэзыдэнцкіх выбараў.
  • Вядома пра наступных затрыманых у «справе Ціханоўскага»:
  1. Сяргей Ціханоўскі
  2. Яўген Разьнічэнка
  3. Зьміцер Фурманаў
  4. Уладзімер Навумік
  5. Вяргілій Ушак
  6. Аляксандар Арановіч
  7. Васіль Баброўскі
  8. Арцём Сакаў
  9. Уладзімер Кніга

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG