27 траўня памёр Міхась Міцкевіч, сын Якуба Коласа. Пра гэта напісала ў фэйсбуку яго ўнучка Васіліна Міцкевіч. Міхасю Міцкевічу было 94 гады.
Міхась Міцкевіч меў ступень доктара тэхнічных навук, вывучаў апрацоўку мэталу. За распрацоўкі ў галіне тэхналёгіі і абсталяваньня для электраэразійнай апрацоўкі мэталаў у 1980 годзе Міцкевіча ўзнагародзілі Дзяржаўнай прэміяй БССР. Міцкевіч падрыхтаваў больш за 150 навуковых прац, зрабіў 20 вынаходак.
Дзякуючы Міхасю Міцкевічу ў 2018 годзе выйшаў непадцэнзурны варыянт паэмы Якуба Коласа «Новая зямля». Міхась Міцкевіч усё жыцьцё трымаў у памяці сапраўдны варыянт твору, які і стаў асновай кнігі.
Акрамя Міхася, у Якуба Коласа было яшчэ два сыны: Даніла і Юры. Юры Міцкевіч загінуў на фронце ў 1941 годзе ў 24-гадовым веку. Старэйшы сын Даніла пасьля сьмерці бацькі стаў першым дырэктарам Дзяржаўнага літаратурна-мэмарыяльнага музэю Якуба Коласа, атрымаў званьне заслужанага дзеяча культуры БССР. Даніла Міцкевіч памёр у 1996 годзе, пахаваны на Вайсковых могілках.
