«Беларуская асацыяцыя журналістаў» (БАЖ) 12 траўня выступіла з заявай, у якой «рашуча пратэстуе супраць прыцягненьня калег да адміністрацыйнай адказнасьці».
11 і 12 траўня суды ў Магілёве і Глыбокім пакаралі журналістаў, сябраў БАЖ Алеся Асіпцова, Міхася Аршынскага, Аляксандра Буракова і Зьмітра Лупача адміністрацыйнымі арыштамі на 10 сутак за нібыта ўдзел у несанкцыянаваных масавых мерапрыемствах, якія журналісты насамрэч асьвятлялі.
Як адзначае БАЖ у сваёй заяве, беларускі закон «Аб СМІ» дае журналістам права прысутнічаць на масавых мерапрыемствах, у раёнах надзвычайных сытуацый, у месцах грамадзка важных падзей і перадаваць адтуль інфармацыю.
«Такім чынам, журналісты мелі права прысутнічаць на акцыях і выконваць там сваю працу», — падкрэсьлівае БАЖ.
«Асаблівым зьдзекам лічым прымяненьне ў якасьці пакараньня адміністрацыйнага арышту ў пэрыяд пандэміі каранавірусу, што ставіць пад сур’ёзную небясьпеку здароўе калег», — заяўляе БАЖ і патрабуе тэрміновага перагляду адміністрацыйных спраў журналістаў і ўсіх іншых, каго «прыцягнулі за адказнасьці за выказваньне меркаваньня», і іх неадкладнага вызваленьня.
- У пачатку траўня ў Беларусі прайшлі пратэсы супраць правядзеньня вайсковага параду падчас пандэміі каранавірусу, якія перайшлі ў акцыі супраць зьняволеньня блогера Сяргея Ціханоўскага, які клікаў на «антыпарад». За апошнія дні ў Беларусі затрымалі і асудзілі дзясяткі чалавек, у тым ліку журналістаў, якія асьвятлялі акцыі.
- Суды пачаліся яшчэ да параду — у Гомлі, Горадні, Лідзе, Магілёве і актывістам прысудзілі ў 15 выраках сумарна прынамсі 102 сутак арышту.
- За 11 траўня вынесьлі прынамсі 28 выракаў на прынамсі 206 сутак арышту і прынамсі 5751 рубель штрафаў.
- За 12 траўня вядома ўжо пра шэсьць выракаў сумарна на 57 сутак арышту.
- На 10 сутак асудзілі таксама журналістаў Алеся Асіпцова, Міхася Аршынскага, Аляксандра Буракова і Зьмітра Лупача, якія асьвятлялі акцыі.
- Некаторыя затрыманыя раней, як то актывіст «Моладзевага блёку Пётар Маркелаў, а таксама затрыманыя 12 траўня яшчэ чакаюць судоў у наступныя дні.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў