Павялічылі бюджэт пражытковага мінімуму, пэнсіі і сацыяльныя дапамогі. Свабода сабрала зьмены, якія адбыліся ў Беларусі 1 траўня.
Сьцісла:
- Павялічылі бюджэт пражытковага мінімуму.
- Павялічацца пэнсіі.
- Пэнсіянэры змогуць езьдзіць у электрычках са зьніжкай.
Павялічылі бюджэт пражытковага мінімуму
Ад 1 траўня бюджэт пражытковага мінімуму — 224,02 рубля, яго павялічылі на 2,9%. Адначасова зь бюджэтам пражытковага мінімуму зьмяняюцца памеры дапамогі на дзяцей:
- за нараджэньне першага дзіцяці будуць даваць 2467,8 рубля;
- за нараджэньне другога і наступных — 3454,92 рубля.
Калі жанчына стане на ўлік у дзяржаўнай установе аховы здароўя да 12 тыдня цяжарнасьці, яна аднаразова атрымае дапамогу 247,78 рубля.
Вырастуць пэнсіі
Павялічацца працоўныя і сацыяльныя пэнсіі, а таксама надбаўкі беларусам ад 75 гадоў. Гэтыя выплаты прывязаныя да бюджэту пражытковага мінімуму. У сярэднім яны вырастуць на 25 рублёў.
Калі пералічваць у даляры, пэнсіі ў Беларусі з 2010 году ня вырасьлі. Падвышэньне на 25 рублёў дазволіць вярнуцца на ўзровень дзевяцігадовай даўнасьці.
Пэнсіянэры змогуць езьдзіць у электрычках са зьніжкай
Ад 1 траўня пэнсіянэры змогуць езьдзіць у электрычках з 50% зьніжкай, яна будзе дзейнічаць да канца верасьня.
Каб набыць квіток са зьніжкай, трэба мець пэнсійнае пасьведчаньне. Гэты ж дакумэнт трэба мець падчас праезду ў цягніку рэгіянальных ліній эканом-клясы.