Міністэрства аховы здароўя Беларусі 25 красавіка апублікавала ў сваім Telegram-канале статыстыку распаўсюду COVID-19 у Беларусі.
Паводле Мінздароўя, на раніцу 25 красавіка ў Беларусі зафіксавалі:
- агулам 9590 чалавек са станоўчым тэстам на COVID-19;
- 67 памерлых, зь якіх усе, як піша міністэрства, былі «з шэрагам хранічных захворваньняў» і каранавіруснай інфэкцыяй (удава аднаго з памерлых кажа, гэта ня так);
- 1573 выпісаных пацыентаў, у якіх была каранавірусная інфэкцыя;
- гэта значыць, за дзень выявілі яшчэ 817 выпадкаў і прызналі яшчэ 4 сьмерці;
- ад пачатку эпідэміі ў краіне зрабілі 139 295 тэстаў;
- колькі пацыентаў у цяжкім стане ці на штучнай вэнтыляцыі лёгкіх, а таксама колькі хворых выпісаныя дамоў на «амбуляторнае лекаваньне», не паведамляецца.
24 красавіка падчас прэс-канфэрэнцыі намесьніца міністра здароўя Алена Богдан выказала сачуваньні тым, каго «ўратаваць не ўдалося». Падчас папярэдніх прэсавых канфэрэнцый словы спачуваньня сем'ям памерлых з вуснаў кіраўніцтва Міністэрства аховы здароўя не гучалі.
- Паводле намесьніцы міністра аховы здароўя Алены Богдан, у Беларусі няма нагрузкі на мэдычную сыстэму, няма недахопу мэдычных сродкаў і сродкаў індывідуальнай засьцярогі.
-
Богдан заклікала беларусаў на вялікіх выходных не выяжджаць за межы сваёй тэрыторыі, ня ехаць на Радаўніцу на могілкі, не цягнуць туды сваіх старых сваякоў і ня ладзіць там пасядзелак. «Мы застаёмся на працы дзеля вас, і просім вас не рабіць лішнія паездкі, не пакідаць сваю тэрыторыю, заставацца дома дзеля нас».
