Лінкі ўнівэрсальнага доступу

«Усё на самым сучасным узроўні». Япрынцаў расказаў пра свой каранавірус і лячэньне ў «прэзыдэнцкім» мэдцэнтры


Рэспубліканскі клінічны мэдцэнтар кіраўніцтва спраў прэзыдэнта, дзе ляжыць Уладзімер Япрынцаў

Сярод пацыентаў Рэспубліканскага клінічнага мэдцэнтру кіраўніцтва спраў прэзыдэнта ў Ждановічах — сябра выканкаму Міжнароднай фэдэрацыі самба Ўладзімер Япрынцаў. Сюды яго паклалі з двухбаковым запаленьнем лёгкіх і каранавірусам, цяпер ён у палаце інтэнсіўнай тэрапіі.

Каранавірус у Беларусі і ў сьвеце. Як разьвіваюцца падзеі >>

У Рэспубліканскім клінічным мэдцэнтры кіраўніцтва спраў прэзыдэнта ў Ждановічах перапрафілявана спэцыяльнае аддзяленьне для лячэньня пацыентаў з каранавірусам.

«У нас лечаць хворых з каранавірусам, як і ва ўсіх лячэбных установах», — сказала карэспандэнту Свабоды галоўны доктар мэдцэнтру Ірына Абельская.

«Нашым лекарам трэба паставіць помнік, вось гэта я ведаю дакладна»

Раней на відэа Ўладзімер Япрынцаў паказаў сваю палату: кісларод, маску, ложак і вакно з маляўнічым пэйзажам. У палаце ён адзін.

Уладзімер Япрынцаў сказаў, што ён моцна кашляе, таму цяпер яму нязручна даваць інтэрвію.

«Нашым лекарам трэба паставіць помнік, вось гэта я ведаю дакладна», — сказаў карэспандэнту Свабоды Ўладзімер Япрынцаў.​

Раней на відэа падчас онлайн-эстафэты On A Wave Stay Live Уладзімер Япрынцаў казаў, што яму стала лепш і доктар дазволіў рабіць невялікую гімнастыку. Спартовец заклікаў «ня падаць духам» і зьвярнуўся да іншых спартоўцаў, каб тыя дзяліліся сваім досьведам, практыкаваньнямі, як падтрымаць форму ў самаізаляцыі. Ён пастаяў на галаве, пакачаў прэс і ўтрымаў цела на руках у бакасане (поза жорава).

Уладзімер Япрынцаў сказаў карэспандэнту Свабоды, што пасьля гэтага відэа многія выказалі яму словы падтрымкі.

«Гэта мяне папрасілі сябры з Расеі, што ідзе вар’яцтва, гістэрыя, усе баяцца, падтрымайце. Вось я такое відэа зрабіў, што нічога страшнага няма. Ва ўсялякіх сытуацыях бывае чалавек, і ён павінен заставацца чалавекам, а ня нейкай спалоханай жывёлай. Чыноўнікі павінны рабіць сваю справу, і, лічу, правільна, што кіраўніцтва ў нас, калі ты працуеш на людзей, то ідзі і працуй, і няма чаго тут страх паказваць. Ну, а людзі няхай паберагуцца, калі можна».

Уладзімер Япрынцаў кажа, што не выстаўляў відэа ў інтэрнэт, «гэта проста ішло ў Маскву, а нехта, відаць, падзяліўся». Для яго было нечаканым, што яно зьявілася ў Беларусі.

«Нас з кіраўніцтвам фэдэрацыі самба Беларусі крыху закранае, што нас, беларусаў, лічаць ненармальнымі, што многія спартоўцы трэніруюцца. Яны трэніруюцца ў ізаляцыі, знаходзяцца на зборах у Стайках, дзе іх дзяржава корміць, падтрымлівае, і яны адтуль не выяжджаюць. Калі яны нават выяжджаюць па сваіх справах, то пасьля гэтага цягам двух тыдняў павінны знаходзіцца ў самаізаляцыі, каб не было рызыкі заражэньня. Мы да гэтага ставімся вельмі сур’ёзна. Таму нельга казаць, што тут усе вар’яты і ненармальныя».

Паводле Япрынцава, Міністэрства спорту робіць усё магчымае, каб ніхто не заразіўся і каб усе працягвалі трэніроўкі.

«Я не саромеюся казаць, што „падхапіў“»

Уладзімер Япрынцаў ня ведае, як мог заразіцца каранавірусам, бо з 28 сакавіка знаходзіўся ў Беларусі.

«Але як толькі адчуў сябе кепска, адразу ж пайшоў на самаізаляцыю і нікога не падпускаў. Дзеці прыносілі ежу, пакідалі яе, я да гэтага сур’ёзна паставіўся. Ну, што зробіш, для нечага гэта трэба. Я спакойна да гэтага стаўлюся. Героі — гэта лекары. Уявіце, раніцай яны на зьмену апранаюць гэтую абарончую вопратку і цягам васьмі гадзін нават у прыбіральню ня могуць схадзіць. І гэта тут, я знаходжуся ў лечкамісіі. А ўявіце ў іншых бальніцах, дзе больш людзей, яны там наогул „пашуць“. Яны ўсе героі», — кажа Ўладзімер Япрынцаў.

Уладзімер Япрынцаў ня стаў расказваць, хто ў мэдцэнтры, апроч яго, з каранавірусам — маўляў, «няхай яны самі кажуць».

«Я не саромеюся казаць, што „падхапіў“. У гэтым жыцьці былі, ёсьць і будуць непрыемнасьці і нейкія праблемы. Галоўнае, каб хапала сіл мужна і годна іх пераадольваць. У кожнага свая гісторыя. А людзі тут ёсьць, гэта зразумела».

Уладзімер Япрынцаў кажа, што ўжо восем дзён ён у лякарні ў ізаляцыі, нікуды не выходзіць.

«Праз вакно бачу, як тут усё прыгожа, прыбрана. Кіраўніцтва — малайцы. У нас ёсьць многа прадпрыемстваў, ім грошы дадуць, а быў бардак і застаўся. А тут усюды чысьценька, ня чысьценька-бедненька, а ўсё добра, усё на самым сучасным узроўні і, самае галоўнае, чалавечае стаўленьне».

Уладзімер Япрынцаў цяпер адзін у платнай палаце.

«Я зьвязваюся са сваімі сябрамі, у мяне ёсьць спартоўцы, як дзеці мае, за кім я заўсёды глядзеў, і якія хварэюць, у абласной бальніцы ляжаць. І ўсе кажуць, што стаўленьне дактароў чалавечнае, яны на сваім месцы. У мяне кола такое, я не цярплю людзей, якія румзаюць, ныюць, усе вінаватыя вакол. У мяне няма такіх людзей, я стараюся іх абмінаць».

Уладзімер Япрынцаў сказаў, што ягоная сям’я на самаізаляцыі, тэсты адмоўныя. А ў яго, «напэўна, падсела імунка», бо ён моцны чалавек і ніколі не хварэў на запаленьне лёгкіх.

Як праходзіла хвароба?

«Цяжкага нічога не было, як звычайны грып, нічога звышардынарнага. Нічога геройскага пераадольваць мне не давялося. Лёгкія ж не баляць, баляць цягліцы».

Пасьля выздараўленьня Ўладзімер Япрынцаў зьбіраецца здаваць кроў для плязмы, каб дапамагчы іншым хворым.

«Тут нічога геройскага няма, многія, з кім я размаўляў, казалі таксама, што абавязкова пойдуць, каб падзяліцца, калі гэта трэба людзям. Гэта, магчыма, і знак такі, каб падзяліцца, хто душой, хто цяплом».

Што трэба ведаць пра новы каранавірус, які выклікае COVID-19

  • УЖЫВУЮ Каранавірус у Беларусі і ў сьвеце. Як разьвіваюцца падзеі
  • Невядомы раней вірус выявілі ў кітайскім горадзе Ўхань у сьнежні 2019 году.
  • Афіцыйнай назвай хваробы ад новага каранавірусу з Кітаю стала COVID-19 (coronavirus disease).
  • Сусьветная арганізацыя здароўя рэкамэндуе трымацца далей ад людзей, якія чхаюць і кашляюць, добра мыць рукі, ня есьці дрэнна апрацаванае (недасмажанае або недаваранае) мяса, абмежаваць сацыяльныя кантакты.
  • Сусьветная арганізацыя здароўя абвясьціла распаўсюд каранавіруснай інфэкцыі COVID-19 у сьвеце пандэміяй.

  • Праявы каранавірусу падобныя да іншых вострых вірусных захворваньняў. Ён суправаджаецца павышанай тэмпэратурай, ліхаманкай і цяжкасьцямі дыханьня, у хворага могуць зьяўляцца кашаль, млявасьць, пагаршэньне агульнага стану; можа выклікаць бранхіт і пнэўманію.
  • Проста чханьне — не сымптом каранавірусу.
  • Каранавірусы — сямейства з больш як 30 вірусаў, якія былі ўпершыню выдзеленыя ў 1965 годзе. Паражаюць людзей, свойскіх жывёлаў, сьвіней, буйную рагатую жывёлу, птушак і здольныя правакаваць пашкоджаньне дыхальнай сыстэмы, страўнікава-кішачнага тракту, нэрвовай сыстэмы. Вядома, што інфэкцыя перадаецца ад чалавека да чалавека. Сярод сымптомаў — гарачка, кашаль і цяжкае дыханьне. Паколькі гэтыя сымптомы падобныя да многіх іншых рэсьпіратарных захворваньняў, неабходны дадатковы скрынінг. ​


Найважнейшыя пытаньні і адказы пра каранавірус

Як зьмяняецца колькасьць хворых у Беларусі і суседніх краінах. Толькі графікі

Беларускія мэдыкі, якія загінулі падчас пандэміі COVID-19. СЬПІС ПАМЯЦІ

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG