Міністар аховы здароўя Беларусі Ўладзімер Каранік заявіў, што, паводле апытаньня, нібыта 40% бацькоў прасілі не падаўжаць школьных вакацый.
Такую заяву, піша БелаПАН, міністар зрабіў 9 красавіка перад дэпутатамі Палаты прадстаўнікоў.
Адкуль узяліся такія лічбы, а таксама колькі адсоткаў было за працяг канікулаў, не паведамляецца.
У Беларусі не абвяшчалі карантыну ў навучальных установах, але падоўжылі школьныя вакацыі на 6 дзён — да 11 красавіка ўключна.
Беларусы накіроўвалі дзяржаўным органам і міжнародным арганізацыям шэраг пэтыцыяў за карантын у навучальных установах. Аляксандар Лукашэнка заяўляў, што «патрабаваньні падоўжыць вакацыі з боку бацькоў, мэдыцыны — гэта няправільна», але вусна дазволіў бацькам не выпраўляць дзяцей у школу.
Што трэба ведаць пра новы каранавірус з Кітаю
- Невядомы раней вірус выявілі ў кітайскім горадзе Ўхань у сьнежні 2019 году.
- Афіцыйнай назвай хваробы ад новага каранавірусу з Кітаю стала COVID-19 (coronavirus disease).
- Сусьветная арганізацыя здароўя рэкамэндуе трымацца далей ад людзей, якія чхаюць і кашляюць, добра мыць рукі, ня есьці дрэнна апрацаванае (недасмажанае або недаваранае) мяса, абмежаваць сацыяльныя кантакты.
- Сусьветная арганізацыя здароўя абвясьціла распаўсюд каранавіруснай інфэкцыі COVID-19 у сьвеце пандэміяй.
- Праявы каранавірусу падобныя да іншых вострых вірусных захворваньняў. Ён суправаджаецца павышанай тэмпэратурай, ліхаманкай і цяжкасьцямі дыханьня, у хворага могуць зьяўляцца кашаль, млявасьць, пагаршэньне агульнага стану; можа выклікаць бранхіт і пнэўманію.
- Каранавірусы — сямейства з больш як 30 вірусаў, якія былі ўпершыню выдзеленыя ў 1965 годзе. Паражаюць людзей, свойскіх жывёлаў, сьвіней, буйную рагатую жывёлу, птушак і здольныя правакаваць пашкоджаньне дыхальнай сыстэмы, страўнікава-кішачнага тракту, нэрвовай сыстэмы. Вядома, што інфэкцыя перадаецца ад чалавека да чалавека. Сярод сымптомаў — гарачка, кашаль і цяжкае дыханьне. Паколькі гэтыя сымптомы падобныя да многіх іншых рэсьпіратарных захворваньняў, неабходны дадатковы скрынінг.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў