Лінкі ўнівэрсальнага доступу

«Чаму вы нічога ня кажаце?» Касьцёл патрабуе ад Мінздароўя адказаць, як арганізаваць бясьпеку вернікаў падчас каранавірусу


Тадэвуш Кандрусевіч
Тадэвуш Кандрусевіч

Каталіцкі касьцёл ня можа дамагчыся ад Міністэрства аховы здароўя Беларусі адказаў на пытаньні пра арганізацыю бясьпекі вернікаў падчас пандэміі каранавірусу, заявіў на прэс-канфэрэнцыі 7 красавіка старшыня Канфэрэнцыі каталіцкіх біскупаў Беларусі, мітрапаліт Менска-Магілёўскі арцыбіскуп Тадэвуш Кандрусевіч.

Паводле БелаПАН, Тадэвуш Кандрусевіч расказаў, што напісаў ліст міністру аховы здароўя Беларусі Ўладзімеру Караніку, запрашаў яго прыйсьці на міжрэлігійную малітву аб пазбаўленьні ад каранавірусу, бо ў Касьцёле маюць шмат пытаньняў наконт таго, што рабіць для бясьпекі вернікаў ва ўмовах распаўсюду інфэкцыі. Паводле яго, Каранік не прыйшоў, адказаўшы толькі, што «ўсё ў парадку, усё пад кантролем».

«Была Пальмавая нядзеля, мы асьвячаем вербы. Я не спэцыяліст, я ня ведаю, нясе вада гэтую заразу ці не. У суботу трэба будзе асьвячаць велікодную ежу, я таксама ня ведаю [ці бясьпечна выкарыстоўваць для гэтага ваду]. Я задаю пытаньне Міністэрству аховы здароўя: што мы павінны рабіць, чаму вы нічога ня кажаце? Я праз вас, праз мэдыя хачу спатканьня з кім-небудзь адказным, пачуць канкрэтныя адказы», — дадаў ён.

Як адзначыў Кандрусевіч, каталіцкі касьцёл ня можа забараніць вернікам прыходзіць у сьвятыні і ўдзельнічаць у набажэнствах падчас пандэміі каранавірусу, камэнтуючы вялікую колькасьць вернікаў у Пальмавую нядзелю, 4 красавіка, на імшы каля менскага Чырвонага касьцёла, нягледзячы на ягоныя заклікі заставацца дома.

«Мы заклікаем людзей [заставацца дома], але што ж можна зрабіць чалавеку? Мы ня можам стаць альбо нейкага міліцыянэра паставіць. <... > Мы да гэтага заклікаем, і сёньняшняя наша прэс-канфэрэнцыя — гэта таксама заклік да гэтага. Пачуе чалавек ці не пачуе — ня ведаем», — дадаў Кандрусевіч.

Ён таксама заклікаў каталікоў адсьвяткаваць Вялікдзень дома, а тых, хто ўсё ж прыйдзе, «глядзець на стан свайго здароўя і захоўваць неабходную дыстанцыю падчас наведваньня храма».

На мінулым тыдні Кандрусевіч запрасіў вернікаў у сувязі з пандэміяй каранавірусу ўстрымацца ад наведваньня касьцёлаў і ўдзельнічаць у сьвяточных набажэнствах з дапамогай трансьляцый. Яшчэ раней арцыбіскуп Кандрусевіч увёў у касьцёлах па ўсёй краіне шэраг правілаў, скіраваных на нераспаўсюджваньне каранавірусу.

Каб не дапусьціць распаўсюджваньня эпідэміі каранавірусу, прэсавы сакратар Канфэрэнцыі каталіцкіх біскупаў у Беларусі Юры Санько заклікаў не пускаць у храм старых, дзяцей і моладзь.

Некаторыя вернікі, у тым ліку пажылога веку, нягледзячы на заклікі, узялі ўдзел у набажэнствах Вялікага тыдня ў храмах і на вуліцах.

Што трэба ведаць пра новы каранавірус, які выклікае COVID-19

  • Невядомы раней вірус выявілі ў кітайскім горадзе Ўхань у сьнежні 2019 году.
  • Афіцыйнай назвай хваробы ад новага каранавірусу з Кітаю стала COVID-19 (coronavirus disease).
  • Сусьветная арганізацыя здароўя рэкамэндуе трымацца далей ад людзей, якія чхаюць і кашляюць, добра мыць рукі, ня есьці дрэнна апрацаванае (недасмажанае або недаваранае) мяса, абмежаваць сацыяльныя кантакты.
  • Сусьветная арганізацыя здароўя абвясьціла распаўсюд каранавіруснай інфэкцыі COVID-19 у сьвеце пандэміяй.

  • Праявы каранавірусу падобныя да іншых вострых вірусных захворваньняў. Ён суправаджаецца павышанай тэмпэратурай, ліхаманкай і цяжкасьцямі дыханьня, у хворага могуць зьяўляцца кашаль, млявасьць, пагаршэньне агульнага стану; можа выклікаць бранхіт і пнэўманію.
  • Каранавірусы — сямейства з больш як 30 вірусаў, якія былі ўпершыню выдзеленыя ў 1965 годзе. Паражаюць людзей, свойскіх жывёлаў, сьвіней, буйную рагатую жывёлу, птушак і здольныя правакаваць пашкоджаньне дыхальнай сыстэмы, страўнікава-кішачнага тракту, нэрвовай сыстэмы. Вядома, што інфэкцыя перадаецца ад чалавека да чалавека. Сярод сымптомаў — гарачка, кашаль і цяжкае дыханьне. Паколькі гэтыя сымптомы падобныя да многіх іншых рэсьпіратарных захворваньняў, неабходны дадатковы скрынінг. ​

Найважнейшыя пытаньні і адказы пра каранавірус

Беларускія мэдыкі, якія загінулі падчас пандэміі COVID-19. СЬПІС ПАМЯЦІ

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG