Лінкі ўнівэрсальнага доступу

Кітай абмежаваў працу пяці амэрыканскіх СМІ


Кітай адклікаў акрэдытацыю карэспандэнтаў амэрыканскіх выданьняў The New York Times, The Wall Street Journal і The Washington Post. Акрамя таго, Пэкін ўвёў абмежаваньні на працу «Голасу Амэрыкі» і часопісу Time. Так кітайскія ўлады адказалі на абмежаваньні, уведзеныя Вашынгтонам у дачыненьні да пяці кітайскіх СМІ, якія працуюць у ЗША.

Карэспандэнтаў The New York Times, The Wall Street Journal і The Washington Post на працягу 10 дзён пазбавяць акрэдытацыі. Яны больш ня змогуць працаваць на тэрыторыі КНР, у тым ліку ў асаблівых адміністрацыйных раёнах Ганконг і Макао. Ад гэтых СМІ, а таксама ад «Голасу Амэрыкі» і часопісу Time Пэкін запатрабаваў даць уладам інфармацыю пра супрацоўнікаў, фінансавую дзейнасьць і нерухомасьць на тэрыторыі КНР.

Дзяржсакратар ЗША Майк Пампэо, камэнтуючы рашэньне Пэкіну, падкрэсьліў, што Вашынгтон наклаў абмежаваньні на арганізацыі, якія займаюцца на тэрыторыі ЗША кітайскай прапагандай.

«Голас Амэрыкі» асудзіў рашэньне Пэкіну. У заяве рэдакцыі гаворыцца, што дзеяньні КНР скіраваныя на далейшыя абмежаваньні свабоды прэсы ў краіне.

Пра тое, што ЗША абвясьцілі пяць кітайскіх СМІ – агенцтва «Сіньхуа», тэлеканал CCTN, «Міжнароднае радыё Кітаю», мэдыякампаніі China Daily Distribution Corporation і Hai Tian Development USA – замежнымі агентамі, стала вядома ў лютым. Вашынгтон заявіў, што рашэньне не паўплывае на працу СМІ, але абавяжа прасіць дазволу ў амэрыканскіх уладаў на наём новых супрацоўнікаў і набыцьцё маёмасьці. Пэкін тады заявіў, што ўлады Кітаю могуць прыняць меры ў адказ.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG