Беларуская эканоміка не дасягнула такой ступені ўстойлівасьці, каб супрацьстаяць вонкаваму ўплыву, заявіў Аляксандр Лукашэнка на нарадзе аб выніках сацыяльна-эканамічнага разьвіцьця за 2019 год.
Паводле Лукашэнкі, занадта шмат увагі надаецца таму, якая цана нафты, які курс валюты ў краінах — гандлёвых партнэрах, якія абмежаваньні ўводзяцца для Беларусі.
«Рэагуем на кожны шоргат, так быць не павінна, — цытуе Лукашэнку БелТА. — Усё мусім бачыць і ўлічваць, але гэта не павінна быць арыентырам у нашай дзейнасьці. Мы невялікая краіна з адкрытай эканомікай. Менавіта таму мусім умець гнутка адаптавацца да аб’ектыўных умоваў, у якіх жыве навакольны сьвет».
Лукашэнка заўважыў, што летась традыцыйныя сэктары эканомікі не далі чаканай аддачы — унёсак у валавым унутраным прадукце ўсіх відаў вытворчасьці і прадпрыемстваў IT-сэктару аказаўся практычна аднолькавы.
«Я ня буду казаць пра тое, што экспарт у 2019 годзе правалілі, прыток імпарту павялічваецца, а ВУП вырас толькі коштам унутранага попыту. Экспарт — прыярытэт пяцігодкі, а мы ня толькі не асвойваем новыя рынкі, а і губляем традыцыйныя. Сёньня гэта пытаньне нашага выжываньня. Адсюль усё: і цэны на нафту, і курс беларускага рубля», — канстатаваў ён.
Лукашэнка не пагадзіўся з прапановамі ўраду наконт асноўных кірункаў праграмы сацыяльна-эканамічнага разьвіцьця Беларусі да 2025 году.
«Захадаў для паскоранага разьвіцьця і дасягненьня валавога ўнутранага прадукту прыкладна ў 100 млрд даляраў я там ня ўбачыў. Усё, што прапанавана, трэба было зрабіць яшчэ пяць гадоў таму», — сказаў ён, запатрабаваўшы не тэарэтызаваць, а самакрытычна прызнавацца ў недапрацоўках.
