Лінкі ўнівэрсальнага доступу

Выбары прэзыдэнта ў ЗША: Байдэн атрымаў важную перамогу над Сандэрсам у 6 штатах


Бэрні Сандэрс (зьлева) і Джо Байдэн на дэбатах у Паўднёвай Караліне, 25 лютага

Прэтэндэнт на ўдзел у прэзыдэнцкіх выбарах у ЗША, былы віцэ-прэзыдэнт Джо Байдэн выйграў у шасьці штатах на праймэрыз Дэмакратычнай партыі. Але Бэрні Сандэрс яшчэ можа стаць канкурэнтам дзейнаму прэзыдэнту, рэспубліканцу Дональду Трампу.

Джо Байдэн абагнаў свайго канкурэнта Бэрні Сандэрса ў штатах Місісіпі, Місуры, Мічыган, Паўночная Дакота, Айдаха і Вашынгтон.

10 сакавіка вызначалася доля галасоў 352 дэлегатаў летняй Нацыянальнай канвэнцыі Дэмакратычнай партыі, дзе выберуць кандыдата ў прэзыдэнты.

Для гэтага кандыдату трэба набраць 1990 галасоў сярод 3979 дэлегатаў. Байдэн значна апярэджвае Сандэрса зь лікам 664 на 573. Паводле вынікаў галасаваньня 10 сакавіка вядома, хто атрымае галасы 47% усіх дэлегатаў на будучым зьезьдзе партыі.

У прэзыдэнцкай гонцы ад дэмакратаў яшчэ застаецца трэцяя прэтэндэнтка: 38-гадовая дэпутатка з Гаваяў Талсі Габард. Але яна здабыла галасы толькі двух дэлегатаў. Астатнія прэтэндэнты спынілі ўдзел у праймэрыз (з тых чатырох, якія здабылі галасы дэлегатаў, тры падтрымалі Байдэна).

На ўсіх праймэрыз Рэспубліканскай партыі, што ўжо прайшлі, упэўненую перамогу атрымліваў дзейны прэзыдэнт Дональд Трамп. У выніку праймэрыз амэрыканскія партыі вылучаюць сваіх кандыдатаў на прэзыдэнцкіх выбарах, што пройдуць 3 лістапада.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG