29-гадовага Віктара Скрундзіка са Случчыны асудзілі на расстрэл за жорсткае забойства двух старых. Забойца гадаваўся ў суседняй вёсцы.
6 сакавіка ў Слуцку вынесьлі прысуд тром жыхарам раёну, абвінавачаным у забойстве двух пэнсіянэраў і замаху на жанчыну, а таксама ў крадзяжах і падпале маёмасьці ахвяраў. Злачынствы адбыліся год таму ў вёсках Ульянаўка Слуцкага раёну і ў Сухоўчыцах суседняга Капыльскага.
29-гадовага Віктара Скрундзіка, якога сьледзтва палічыла кіраўніком злачыннай групоўкі, асудзілі да вышэйшай меры пакараньня — расстрэлу.
Ягоныя саўдзельнікі Віталь Мяцеж і Валянцін Бушнін атрымалі адпаведна 22 і 18 гадоў калёніі строгага рэжыму.
Сваякі забітых — 94-гадовага Ўладзімера Гаркавага і 79-гадовага Міхаіла Шугалея, а таксама іх аднавяскоўцы віталі прысуд менскага абласнога суду, а некаторыя нават шкадавалі, што з трох вінаватых расстраляюць толькі аднаго.
Людміла Пісарчык, дачка загінулага Ўладзімера Гаркавага, гэтак пракамэнтавала прысуд:
«Я згодная з прысудам і з тым, што Скрундзіку далі сьмяротную кару. Фашысты ў вайну Хатынь спалілі зь людзьмі, гэтак і ён зрабіў. Такі ж самы і таго ж заслужыў».
Падсудныя выслухалі прысуд моўчкі. На пытаньне журналіста Радыё Свабода, ці будуць абскарджваць рашэньне суду, адказалі маўчаньнем.
Сьмяротнае пакараньне ў Беларусі
- Беларусь застаецца апошняй краінай Эўропы, дзе караюць сьмерцю.
- Усяго за гады незалежнасьці ў Беларусі вынесьлі больш за 300 сьмяротных прысудаў.
- Улады Беларусі не паведамляюць пра выкананьне сьмяротных прысудаў. Пра гэта ўдаецца даведацца з паказаньняў іншых сьмяротнікаў або ад праваабаронцаў, якія кантактуюць з роднымі асуджаных.
- Эўразьвяз пэрыядычна заклікае Беларусь адмовіцца ад сьмяротнага пакараньня.
- Нягледзячы на ўсе просьбы міжнароднай супольнасьці, рэжым Лукашэнкі працягвае выносіць сьмяротныя прысуды. 19 кастрычніка 2023 вынесены чарговы зь іх — Аляксандру Таратуту са Слуцку, які забіў 3-гадовае дзіця.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў