Лінкі ўнівэрсальнага доступу

Белстат чакае, што беларускамоўных паводле перапісу стане «значна больш»


Іна Мядзьведзева, старшыня Нацыянальнага статыстычнага камітэту

Недасканалае валоданьне перапісчыкамі беларускай мовай не магло істотна паўплываць на вынікі перапісу насельніцтва 2019 году. Пра гэта на прэс-канфэрэнцыі ў Менску заявіла старшыня Нацыянальнага статыстычнага камітэту Беларусі Іна Мядзьведзева.

Перапіс насельніцтва праходзіў у Беларусі з 4 па 30 кастрычніка 2019 году.

Карэспандэнтка Радыё Свабода спытала, ці магло паўплываць на вынікі перапісу тое, што перапісчыкі часам не адказвалі па-беларуску, ня ведалі, дзе ў планшэтах беларуская мова, не задавалі пытаньняў пра мову.


«Калі былі пытаньні па беларускай мове — людзі зьвярталіся і на прамую лінію, і да нас — мы стараліся іх вырашаць. Неабыякавыя грамадзяне, якія не прайшлі перапіс, тэлефануюць нам і дагэтуль», — расказала Іна Мядзьведзева.

Кіраўніца Белстату дадала, што «навучыць усіх перапісчыкаў беларускай мове мы не маглі, пагатоў у нас дзьвюхмоўе».

Яна прызнала, што былі выпадкі, калі людзі адмовіліся перапісвацца, бо перапісчык не валодаў беларускай мовай. Але, на думку кіраўніцы Белстату, такая пазыцыя была «ня ў многіх людзей», а большасьць ставілася да гэтага «з разуменьнем». Адпаведна гэта не магло «істотна паўплываць» на вынікі перапісу.

Па словах Мядзьведзевай, колькасьць беларускамоўных па выніках перапісу-2019 можа быць значна большай, чым па выніках перапісу 2009 году. Канкрэтныя ж лічбы Белстат агучыць увосень.

З гісторыі беларускіх перапісаў

Першы афіцыйны перапіс насельніцтва на землях сучаснай Беларусі адбыўся ў 1897 годзе, калі «Северо-Западный край» уваходзіў у склад Расейскай імпэрыі.

Пасьля далучэньня Беларусі да Савецкага Саюзу перапісы праводзіліся ў 1926, 1937, 1939 гадах. Ад 1959-га такія кампаніі ладзяцца раз на 10 гадоў.

Апошні перапіс праводзіўся ў кастрычніку 2009 году. Згодна зь яго вынікамі, у краіне пражывалі 9 мільёнаў 504 тысячы чалавек, беларусаў зь іх — 7 мільёнаў 957 тысяч (83,7% ад агульнай колькасьці).

Тады беларускую мову назвалі роднай 53,2% насельніцтва краіны, дома на ёй гаварылі ўсяго 23%. У часе папярэдняга перапісу 1999 году сытуацыя выглядала нашмат лепш: беларуская была роднай для 73,6% жыхароў.

Вынікі перапісу 2009 году
Вынікі перапісу 2009 году

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG