Іран не валодае тэхнічнымі магчымасьцямі для расшыфроўкі інфармацыі з чорных скрыняў зьбітага пад Тэгеранам пасажырскага «Боінга» «Міжнародных авіяліній Украіны».
Пра гэта заявіў у інтэрв’ю NBC міністар замежных спраў краіны Махамад Джавад Зарыф.
«Боінг-737» Міжнародных авіяліній Украіны пацярпеў крушэньне 8 студзеня неўзабаве пасьля ўзьлёту з аэрапорта Тэгерана. Загінулі ўсе 176 чалавек на борце. Улады Ірана прызналі, што лайнэр быў памылкова быў зьбіты сыстэмай СПА.
Тэгеран спачатку пагадзіўся на міжнароднае расьсьледаваньне катастрофы, але цяпер адмаўляецца перадаць скрыні іншай краіне. Аднак Ірану трэба праграмнае забесьпячэньне, кабэлі і тэхнічная дакумэнтацыя ад ЗША, каб мець магчымасьць расшыфраваць інфармацыю. Па словах Зарыфа, Іран папрасіў аб дапамозе ў расшыфроўцы, але краіне было ў гэтым адмоўлена.
8 студзеня пяць краінаў, чые грамадзяне загінулі ў катастрофе лайнэра, зьвярнуліся да Ірану з патрабаваньнем перадачы самапісцаў, перадавала ўкраінскае выданьне «Эўрапейская праўда». Зарыф лічыць, што Іран мае поўнае права самастойна расьсьледаваць катастрофу і не дзяліцца самапісцамі.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў