Лінкі ўнівэрсальнага доступу

У Кітаі зафіксавалі рэзкі скачок заражэньняў і сьмерцяў ад каранавірусу


Мэдыцынскі работнік у ахоўным касьцюме перамяшчае новага пацыента з каранавірусам на інвалідным крэсьле ў лякарні горада Ўхань, 10 лютага 2020 году

Колькасьць людзей у кітайскай правінцыі Хубэй, у якіх выявілі каранавірус COVID-19, 13 лютага нечакана павялічылася ў разы ў параўнаньні з папярэднімі днямі і склала 14 840 выпадкаў (амаль 13,5 тысячы зь іх — ва Ўхані), паведамляе Камітэт у пытаньнях гігіены і аховы здароўя рэгіёну.

Да гэтага колькасьць тых, хто заразіўся, павялічвалася ў сярэднім на 1,5-2,5 тысячы чалавек штодня. Кітайскія ўлады патлумачылі такі рост тым, што зьмянілі мэтад дыягнаставаньня.

Павялічылася і колькасьць памерлых — за апошнія суткі ад каранавірусу ў правінцыі Хубэй памерлі 242 чалавекі, зь іх 216 — у горадзе Ўхань. Па ўсім сьвеце пацьверджаныя 1,369 сьмерцяў.

Агулам у правінцыі Хубэй пацьверджана 48 206 выпадкаў заражэньня каранавірусам COVID-19 (па ўсім сьвеце — больш за 60 тысяч). У лякарнях правінцыі знаходзяцца 33 693 чалавекі, стан 5,6 тысячы ацэньваецца як крытычны. Паправіліся і выпісаліся са шпіталёў 3 441 пацыент.

Як паведамілі напярэдадні ў Сусьветнай арганізацыі аховы здароўя, цяпер у распрацоўцы знаходзяцца чатыры вакцыны супраць каранавірусу, дзьве зь іх могуць пачаць тэставаць на людзях праз тры-чатыры месяцы.

Праз эпідэмію каранавірусу ўжо адмянілі або адклалі некалькі масавых мерапрыемстваў. 12 лютага Міжнародная аўтамабільная фэдэрацыя (FIA) прыняла рашэньне перанесьці на больш позьні тэрмін правядзеньне Гран-пры «Формулы-1» у Кітаі. У той жа дзень арганізатары выставы Сусьветнага мабільнага кангрэсу ў Барсэлёне канчаткова пацьвердзілі інфармацыю аб яе адмене ў сувязі з пагрозай распаўсюду каранавірусу.

Міністар аховы здароўя Беларусі Ўладзімер Каранік 12 лютага расказаў, што выпадкаў захворваньня ў Беларусі не зафіксавана. Паводле яго, з 30 студзеня пераведзеныя ў рэжым павышанай гатоўнасьці санітарна-эпідэміялягічная служба, хуткая мэдыцынская дапамога, усе арганізацыі аховы здароўя; створаныя неабходныя рэзэрвы лекаў, сродкаў індывідуальнай абароны.

Што трэба ведаць пра новы каранавірус з Кітаю

  • Невядомы вірус выявілі ў кітайскім горадзе Ўхань у сьнежні 2019 году. Спачатку паведамлялі, што ва Ўхані была зарэгістраваная ўспышка пнэўманіі, аднак мэдыкі высьветлілі, што прычынай хваробы стаў раней невядомы від каранавірусу.
  • Афіцыйнай назвай хваробы ад новага каранавірусу з Кітаю стала COVID-19 (coronavirus disease). Вірус спачатку меў назву 2019-nCov, цяпер афіцыйна завецца SARS-CoV-2.
  • Па стане на раніцу 27 лютага, ад новага вірусу па ўсім сьвеце памерлі ўжо 2801 чалавек, афіцыйна пацьвердзілі больш за 82 тысячы выпадкаў заражэньня вірусам (абсалютная большасьць выпадкаў хваробы і сьмерцяў ад яе фіксуюць у Кітаі). За распаўсюдам вірусу можна сачыць тут (дадзеныя абнаўляюцца штодзённа).
  • На 27 лютага 1595 выпадкаў COVID-19 зафіксавалі ў Паўднёвай Карэі, 453 — у Італіі, 189 — у Японіі, 139 — у Іране. У іншых краінах — менш за сотню пацьверджаных выпадкаў.
  • 11 студзеня ў Кітаі зафіксавалі першую сьмерць ад хваробы. Кітайскія ўлады прызналі, што вірус можа перадавацца ад чалавека да чалавека, прычым нават падчас інкубацыйнага пэрыяду.
  • Улады Кітаю часова закрывалі ўезд і выезд з 10 гарадоў.
  • Сусьветная арганізацыя аховы здароўя рэкамэндуе трымацца далей ад людзей, якія чхаюць і кашляюць, і ня есьці дрэнна апрацаванае (недасмажанае або недаваранае) мяса. Паводле адной з вэрсій, вірус мог перадацца людзям пасьля ўжываньня якога-небудзь зь мясных або морапрадуктаў з рынку ва Ўхані.​
  • Распаўсюджваньне вірусу з Ухані параўноўваюць з другой успышкай каранавірусу ў Кітаі — SARS-CoV або атыповай пнэўманіі — у 2002-2003 гадах. Тады памерлі каля 800 хворых.
  • Улады Кітаю 24 студзеня заявілі, што самая першая пацыентка з новым каранавірусам выздаравела і выпісаная зь лякарні. 56-гадовая жанчына адчула сябе блага 10 студзеня, была шпіталізаваная 15-га.
  • Праявы каранавірусу падобныя да іншых вострых вірусных захворваньняў. Ён суправаджаецца павышанай тэмпэратурай, ліхаманкай і цяжкасьцямі дыханьня, у хворага могуць зьяўляцца кашаль, млявасьць, пагаршэньне агульнага стану; можа выклікаць бранхіт і пнэўманію.
  • Аляксандар Лукашэнка казаў, што беларусам наконт каранавірусу хвалявацца ня варта: «Мыйце рукі, менш абдымайцеся зь незнаёмымі людзьмі на вуліцы, усё астатняе — за Міністэрствам здароўя». Беларускія мэдыкі ж давалі больш дэталёвыя рэкамэндацыі.
  • У сувязі з распаўсюдам каранавірусу ў аэрапортах Беларусі, а таксама іншых краінаў узмацнілі захады бясьпекі: з дапамогай спэцыяльных рамак і іншых прыбораў вымяраюць тэмпэратуру людзей, якія ляцяць з Кітаю і іншых краінаў «групы рызыкі».
  • Вядзецца санітарны кантроль на ўсіх памежных пунктах пропуску ў Беларусь, у тым ліку з дапамогай цеплавізійнага абсталяваньня. Лябараторныя сродкі для выяўленьня 2019-nCoV ужо даставілі ў краіну.
  • Міністэрства аховы здароўя, а таксама міністэрства спорту і турызму параілі беларусам ня езьдзіць у Кітай.
  • Каранавірусы — сямейства з больш як 30 вірусаў, якія былі ўпершыню выдзеленыя ў 1965 годзе. Паражаюць людзей, свойскіх жывёлаў, сьвіней, буйную рагатую жывёлу, птушак і здольныя правакаваць пашкоджаньне дыхальнай сыстэмы, страўнікава-кішачнага тракту, нэрвовай сыстэмы. Вядома, што інфэкцыя перадаецца ад чалавека да чалавека. Сярод сымптомаў — гарачка, кашаль і цяжкае дыханьне. Паколькі гэтыя сымптомы падобныя на многія іншыя рэсьпіратарныя захворваньні, неабходны дадатковы скрынінг.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG