Лінкі ўнівэрсальнага доступу

Лукашэнка — Пампэо: «У нас дыктатура ў тым, што ўсе адпачываюць, а прэзыдэнт працуе»


Аляксандар Лукашэнка падчас сустрэчы з Майкам Пампэо

Аляксандар Лукашэнка павітаў дзяржаўнага сакратара ЗША, запэўніўшы, што гатовы «абмеркаваць ўсе пытаньні, якія сёньня ў парадку дня нашых стасункаў, і шчыра адказаць на ўсе пытаньні», перадае карэспандэнт Радыё Свабода зь менскага Палацу Незалежнасьці.

Яшчэ перад афіцыйнай сустрэчай Лукашэнка пажартаваў, што «дыктатура ў Беларусі адрозьніваецца тым, што ў суботу-нядзелю ўсе адпачываюць, а прэзыдэнт працуе». Ён назваў Пампэо «адным з архітэктараў сучаснай палітыкі ЗША».

«Добра, што вы пасьля рознага кшталту абсалютна беспадстаўных непаразуменьняў мінулых уладаў рызыкнулі прыехаць у Менск і паглядзець на гэтую краіну — што тут за народ, што за людзі, што за дыктатура, што за дэмакратыя».

«З ЗША аб’ядноўвае супольная гісторыя барацьбы з нацызмам»

Кіраўнік Беларусі адзначыў, што ў Беларусі «мірны народ», які з ЗША аб’ядноўвае супольная гісторыя барацьбы з нацызмам.

«Уся краіна была пакрытая канцлягерамі, габрэйскімі гета, кожны трэці чалавек загінуў», — сказаў Лукашэнка.

Лукашэнка згадаў, што напярэдадні візыту «ворагі» шмат пісалі пра стасункі Беларусі і ЗША. «Жартавалі, зьдзекаваліся, блазнавалі», — ахарактарызаваў Лукашэнка зьмест такіх допісаў.

Аляксандар Лукашэнка вітае Майка Пампэо
Аляксандар Лукашэнка вітае Майка Пампэо

«Завочна знаёмыя»

Паводле Лукашэнкі, ён ужо знаёмы з Майкам Пампэо, «на жаль, завочна», падчас працы таго на папярэдняй пасадзе.

«Мы сумесна з амэрыканцамі праводзілі шэраг захадаў з удзелам нашых спэцслужбаў у барацьбе супраць тэрарызму, гандлю людзьмі. Правялі некалькі сур’езных апэрацыяў супрацьдзеяньня распаўсюду ядзерных элементаў і на мяжы зь Беларусьсю. Я памятаю некалькі выпадкаў: мы разам затрымалі некалькі злачынцаў, якія перамяшчалі празь мяжу ядзерныя матэрыялы ў бок Захаду», — сказаў Лукашэнка.

Майк Пампэо ў сваю чаргу заявіў, што яму прыемна сустрэцца з прэзыдэнтам Лукашэнкам.

«Мы ўсе працуем сумесна для барацьбы з тэрарызмам і высока цэнім вашую працу. Спадзяюся, мы можам разьвіваць дачыненьні, каб у Беларусі былі магчымасьці мець суверэнітэт і незалежнасьць. Я так разумею, гэта тое, што вы хочаце. Мы разумеем, што вы суседзі з Расеяй, у вас доўгая гісторыя, але мы ня кажам пра выбар паміж вамі і імі, мы кажам пра дыпляматычныя стасункі. Неўзабаве мы прызначым амбасадара», — сказаў Пампэо.

«ЗША занепакоеныя станам правоў чалавека»

Майк Пампэо зазначыў, што для ЗША важнае пытаньне правоў чалавека і яны занепакоеныя іх становішчам. Вашынгтон будзе працягваць працу ў галіне абароны правоў чалавека.

Пасьля афіцыйнага вітаньня прэсу папрасілі пакінуць залю перамоваў.

«Мне падабаецца амэрыкаская прэса і тое, калі яна сыходзіць», — пажартаваў Пампэо.

Лукашэнка падтрымаў ягоны жарт: «Журналістаў называюць „чацьвёртая улада“, і я заўсёды кажу: вы не забывайце, што чацьвёртая ўлада, а ня першая». Далей у прэс-цэнтры было чуваць словы перакладніцы Пампэо.

«Так, мы таксама іх ап...» — на гэтым сувязь з прэс-цэнтрам перарвалася. Што робіць Пампэо з журналістамі, засталося невядомым.

Аляксандар Лукашэнка і Майк Пампэо працягваюць перамовы сам-насам. Яны доўжацца ўжо больш за 1,5 гадзіны.

Другі ў гісторыі візыт дзяржаўнага сакратара ЗША ў Беларусь

Пампэо наведвае Беларусь у рамках эўрапейскага турнэ. Перад Менскам ён ужо пабываў у Лёндане і Кіеве, пасьля наведае Нур-Султан (Казахстан) і Ташкент (Узбэкістан).

Спачатку плянавалася, што Пампэо прыляціць у Беларусь раней, 4 студзеня. Аднак усё эўрапейскае падарожжа давялося адкласьці з прычыны падзей у Іране.

Майк Пампэо ў менскім аэрапорце, 1 лютага 2020
Майк Пампэо ў менскім аэрапорце, 1 лютага 2020

Анансуючы візыт, дзяржаўны дэпартамэнт адзначыў, што яго мэта — «падкрэсьліць прыхільнасьць ЗША сувэрэннай, незалежнай, стабільнай і квітучай Беларусі і пацьвердзіць нашае жаданьне нармалізаваць нашыя двухбаковыя дачыненьні».

Майк Пампэо — другі за гісторыю дзяржаўны сакратар ЗША, які наведвае Рэспубліку Беларусь. Да яго на пачатку 1990-х у Беларусь прыяжджаў Уорэн Крыстафэр. Але гэта ня самыя высокія амэрыканскія госьці ў гісторыі Беларусі: у 1994 годзе Беларусь наведаў прэзыдэнт ЗША Біл Клінтан.

17 верасьня летась у Беларусь прыляцеў намесьнік дзяржаўнага сакратара Дэвід Гэйл. На сустрэчы з Аляксандрам Лукашэнкам ён абвясьціў рашэньне вярнуць у Беларусь амэрыканскага амбасадара.

Беларусь выслала амбасадара ЗША ў 2008 годзе пасьля таго, як Вашынгтон наклаў на яе санкцыі за парушэньні правоў чалавека.

Як разьвіваліся адносіны Беларусі і ЗША. Галоўнае

  • ЗША прызналі Беларусь у 1992 годзе.
  • У 1994 годзе ЗША, разам зь Вялікай Брытаніяй і Расеяй, падпісалі Будапэшцкі мэмарандум аб гарантыях бясьпекі для Беларусі ў абмен на перадачу Беларусьсю ядзерных узбраеньняў Расеі.
  • Прэзыдэнт ЗША Біл Клінтан быў зь візытам у Беларусі ў 1994 годзе, падчас візыту ён наведваў Курапаты.

  • Кіраўнік Беларусі Аляксандар Лукашэнка ніводнага разу ня быў з афіцыйным візытам у ЗША.
  • Таваразварот гандлю паміж Беларусьсю і ЗША ў 2018 годзе склаў 711 мільёнаў даляраў.
  • Аляксандар Лукашэнка неаднойчы казаў, што без ЗША канфлікт ва Ўкраіне ня можа быць вырашаны.
  • У 2016 годзе кіраўнік Беларусі заяўляў, што прэзыдэнцкія выбары ў ЗША выйграе Дональд Трамп.
Error rendering VK.

  • У 2010-я гады Беларусь была адным са шляхоў невайсковага транзыту грузаў для амэрыканскай вайсковай групоўкі ў Аўганістане.
  • У ЗША ў 2004 годзе быў прыняты закон «Акт аб дэмакратыі для Беларусі», які абмяжоўвае гандаль паміж дзьвюма краінамі і забараняе ўраду ЗША галасаваць у міжнародных фінансавых арганізацыях за выдзяленьне Беларусі крэдытаў.
  • З 2006 году адносна беларускіх чыноўнікаў дзейнічаюць амэрыканскія візавыя санкцыі.
  • У 2007 годзе ЗША ўвялі эканамічныя санкцыі адносна прадпрыемстваў беларускага канцэрну «Белнафтахім».
  • У 2008 годзе Менск запатрабаваў ад‘езду з краіны пасла ЗША Карэн Ст’юарт.
  • Адначасова штат амбасады быў скарочаны з 35 супрацоўнікаў да пяці.
    З таго часу і дагэтуль ЗША ў Беларусі і Беларусь у ЗША прадстаўленыя на ўзроўні часовых павераных.

11 год без амбасадараў. Як мяняліся дыпляматычныя стасункі паміж ЗША і Беларусьсю

  • У 2015 годзе ЗША віталі вызваленьне палітвязьняў у Беларусі і высілкі Менску па спрыяньні ўрэгуляваньню канфлікту на ўсходзе Ўкраіны.
  • У 2015 годзе ўлады ЗША прыпынілі дзеяньне эканамічных санкцый адносна Беларусі. У далейшым дзеяньне санкцый прыпынялася кожныя паўгода.
  • У 2019 годзе Менск і Вашынгтон дамовіліся аднавіць паўнавартасныя дыпляматычныя адносіны.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG