Лінкі ўнівэрсальнага доступу

Справа Коржыча і закон аб адтэрміноўках. Чым запомніўся Андрэй Раўкоў на пасадзе міністра абароны


Андрэй Раўкоў падчас рэпетыцыі параду 3 ліпеня ў Менску. 1 ліпеня 2019 году

20 студзеня былы міністар абароны Андрэй Раўкоў стаў сакратаром Савету бясьпекі. Ён узначальваў Міністэрства абароны больш за пяць гадоў. Нагадваем самыя прыкметныя падзеі, якія адбыліся ў беларускім войску, калі міністрам быў Андрэй Раўкоў.

Справа Коржыча

Андрэй Раўкоў узначаліў Міністэрства абароны 27 лістапада 2014 году.

Адной з самых гучных падзей у беларускім войску падчас яго кіраваньня стала справа аб трагічнай гібелі салдата тэрміновай службы Аляксандра Коржыча. Коржыч быў знойдзены мёртвым 3 кастрычніка 2017 году ў падвале аднаго з будынкаў аб’яднанага навучальнага цэнтру ў барысаўскіх Печах.

Мінабароны гаварыла пра шараговы суіцыд. Дзякуючы настойлівасьці родных загінулага і розгаласу ў СМІ справа Аляксандра Коржыча дайшла да суду. Пасьля праверак завялі 10 крымінальных спраў аб «перавышэньні службовых паўнамоцтваў».

Вінаватымі ў сьмерці Коржыча прызналі трох сяржантаў зь ягонай часткі. Андрэй Раўкоў на судовыя працэсы не хадзіў. Ён некалькі разоў прымаў у будынку Мінабароны маці загінулага салдата Сьвятлану Коржыч, а ў камэнтарах афіцыйным СМІ прызнаваў існаваньне некаторых праблем зь дзедаўшчынай у беларускай арміі.

Мабільнікі ў вайсковых частках

Пасьля розгаласу абставінаў сьмерці Аляксандра Коржыча салдатам тэрміновай службы дазволілі мець пры сабе мабільныя тэлефоны (без магчымасьці здымаць фота і відэа). У некаторых частках павялічылі колькасьць дазволеных сустрэч з роднымі. Гэтыя перамены зьвязваюць з асабістым рашэньнем міністра абароны Андрэя Раўкова.

Новы закон аб прызыве ў войска

У канцы 2018 году Андрэй Раўкоў анансаваў зьмены ў закон аб прызыве ў войска. На думку міністра абароны, гэта было неабходна для павелічэньня колькасьці прызыўнікоў. Новы законапраект паступіў у Палату прадстаўнікоў летам 2019 году і неўзабаве быў прыняты. Галоўнае новаўвядзеньне — адтэрміноўку ад войска з прычыны навучаньня цяпер можна атрымаць толькі аднойчы.

Зьмены ў заканадаўства выклікалі грамадзкую кампанію. Шэраг кандыдатаў у дэпутаты на выбарах восені 2019 году зрабілі адмену новага закону аб прызыве асноўным пунктам сваёй выбарчай кампаніі.

Абяцаў «адэкватна рэагаваць» на дзеяньні NATO

У кастрычніку 2019 году Андрэй Раўкоў паабяцаў адрэагаваць на павелічэньне вайсковай прысутнасьці NATO на мяжы зь Беларусьсю і правядзеньне вучэньняў NATO Defender Europe.

«У рамках рэагаваньня на гэтыя мерапрыемствы будуць праводзіцца асобныя тактычныя дзеяньні на гэтым кірунку ракетнымі войскамі, артылерыяй, авіяцыяй, мотастралкамі, дэсантнікамі, сумеснымі дзеяньнямі з пагранічнікамі. Мерапрыемстваў дастаткова — і плянавых, і тых, якія зацьверджаны сёньня кіраўніком дзяржавы на нарадзе», — цытавала кіраўніка абароннага ведамства агенцтва БелТА.

Дамовіўся пра пастаўкі ў Беларусь сучасных расейскіх зьнішчальнікаў

Перамовы пра набыцьцё Беларусьсю зьнішчальнікаў СУ-30СМ працягваліся некалькі гадоў. Першапачаткова Расея настойвала на тым, што больш мэтазгодна дазволіць ёй адкрыць у Беларусі ўласныя авіябазы. Аднак Беларусь на гэта не пагадзілася. У выніку першыя чатыры сучасныя зьнішчальнікі былі пастаўленыя ў Беларусь менавіта падчас кіраваньня Андрэя Раўкова ў 2019 годзе. Яшчэ шэсьць самалётаў павінны прыбыць у беларускую армію ў 2020 годзе.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG