Аляксандар Лукашэнка падпісаў 30 сьнежня ўказ аб карэктаваньні сьпісу адміністрацыйных працэдураў. Тэкст указу яшчэ не апублікаваны, але некаторыя дэталі вядомыя з камэнтару прэс-службы Лукашэнкі.
Указ скасоўвае неабходнасьць афармляць да правоў кіроўцы дадатковы талён, у які ставілі пазнакі аб парушэньнях правілаў, а таксама сэртыфікат аб праходжаньні тэхагляду (сама неабходнасьць праходзіць тэхагляд, як вынікае з паведамленьні прэс-службы, застаецца).
Таксама ўказ рэглямэнтуе працэдуру выдачы міжнароднага пасьведчаньня кіроўцы. Зь нядаўняга адказу МУС на сайце Petitions.by вядома, што нават такое пасьведчаньне ня будзе лічыцца ў Беларусі пасьведчаньнем асобы (роўным пашпарту).
Законапраект аб скасаваньні талёнаў да правоў кіроўцы разглядалі прынамсі з 2017 году, а выдаваць міжнародныя пасьведчаньні кіроўцы зьбіраліся яшчэ з 2016 году.
Акрамя таго, указ:
- скарачае тэрміны пастаноўкі на ўлік тых, хто мае патрэбу палепшыць жыльлёвыя ўмовы;
- прызнаньне жылога памяшканьня не адпаведным тэхнічным і санітарным нормам робіць бестэрміновым (цяпер рашэньне дзейнічае 6 месяцаў);
- спрашчае пастаноўку грамадзянаў на консульскі ўлік;
- скасоўвае плату за электронную рэгістрацыю часовага знаходжаньня іншаземцаў у Беларусі;
- пры шэрагу працэдураў у падатковых органах дазваляе грамадзянам замест пашпарту падаваць яго копію — гэта ў сваю чаргу дазволіць падаваць пэўныя заявы ў пісьмовым або электронным выглядзе без асабістай прысутнасьці;
- замест копіі рашэньня суду аб усынаўленьні можна будзе падаваць выпіску з адпаведнага дакумэнту;
- уводзіць «новыя адміністрацыйныя працэдуры, неабходныя для рэалізацыі грамадзянамі сваіх правоў, выключаюцца працэдуры, што страцілі сваю актуальнасьць, напрыклад, па выдачы рашэньняў аб прыватызацыі жылых памяшканьняў».
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў