Лінкі ўнівэрсальнага доступу

Расейская кампанія абяцае за 6 гадоў пабудаваць судна, каб завяршыць «Паўночны паток — 2»


Плывучыя экскаватары рыхтуюцца да пракладкі газаправоду «Паўночны паток — 2» па дне Балтыйскага мора, травень 2018 году

Расейская дзяржаўная Аб’яднаная суднабудаўнічая карпарацыя гатовая спраектаваць і пабудаваць судна-трубаўкладчык, каб завяршыць будаўніцтва газаправоду «Паўночны паток — 2». Такую заяву зрабіў прэзыдэнт карпарацыі Аляксей Рахманаў.

У інтэрвію тэлеканалу «Россия-24» ён сказаў, што карпарацыі спатрэбіцца каля двух гадоў, каб спраектаваць расейскі трубаўкладчык і яшчэ каля чатырох гадоў — каб пабудаваць гэтае спэцыяльнае судна.

Прадстаўнік праектнай кампаніі паведаміў, што па двух нітках «Паўночнага патоку — 2» засталося пракласьці 160 кілямэтраў труб.

Прэзыдэнт ЗША Дональд Трамп ​20 сьнежня падпісаў законапраект, які прадугледжвае санкцыі супраць кампаніяў, што ўдзельнічаюць у будаўніцтве газаправоду «Паўночны паток —​ 2». Ключавы падраднік — швайцарская кампанія Allseas — заявіла, што прыпыняе кладку трубаў па дне Балтыйскага мора.

Санкцыі прадугледжваюць адмову ў амэрыканскіх візах і замарожваньне амэрыканскіх актываў замежных грамадзян і кампаніяў, якія маюць дачыненьне да праектаў «Паўночны паток —​ 2» і «Турэцкі паток». Яны складаюць частку законапраекту аб абаронных выдатках. Амэрыканскія прадстаўнікі неаднаразова называлі газаправод, якім расейскі прыродны газ мае экспартавацца ў Нямеччыну, пагрозай энэргетычнай бясьпецы Эўропы. У законапраекце ён названы «інструмэнтам прымусу».

Амэрыканскія санкцыі выклікалі рэзкую крытыку Нямеччыны. Міністар замежных спраў Нямеччыны Гайка Мас заявіў аб тым, што «санкцыі ўяўляюць сабой умяшаньне ў аўтаномныя рашэньні, прынятыя ў Эўропе».

Працы па пабудове трубаправоду ў Любліне
Працы па пабудове трубаправоду ў Любліне

18 сьнежня амэрыканскія сэнатары Тэд Круз і Рон Джонсан накіравалі Allseas ліст, у якім папярэдзілі аб наступствах працягу працы ў праекце «Паўночны паток —​ 2». Сярод магчымых наступстваў — блякаваньне яе ўласнасьці ў ЗША, забарона на якія-хаця транзакцыі, зьвязаныя з амэрыканскімі фінансавымі інстытутамі, і забарона наведваць ЗША кіраўніцтву кампаніі. Прадстаўнікі апошняй ужо заявілі аб прыпыненьні работ да высьвятленьня наступстваў новага амэрыканскага заканадаўства.

«Allseas будзе выконваць закон і чакаць інструкцыяў, якія зьмяшчаюць неабходныя нарматыўныя, тэхнічныя і экалягічныя тлумачэньні ад адпаведных органаў ЗША», — гаворыцца ў паведамленьні кампаніі ад 21 сьнежня.

Афіцыйна санкцыі павінны ўступіць у сілу ў найбліжэйшыя тыдні. Раней «Газпром» заяўляў, што для завяршэньня работ на апошнім падводным участку газаправоду патрабуецца каля пяці тыдняў.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG