У Беларусі з 1 сьнежня зьмяніліся межы Берасьцейскай, Горадзенскай і Менскай абласьцей. Гэта прадугледжана ўказам № 104 Аляксандра Лукашэнкі ад 15 сакавіка, піша БелТА са спасылкай на Дзяржаўны камітэт па маёмасьці.
Сьцісла: колькасьць раёнаў у кожнай з абласьцей не зьмянілася. Зьмяніліся межы сельсаветаў і прыналежнасьць асобных вёсак. Актуальная мапа абласьцей і раёнаў Беларусі тут.
Каго гэта тычыцца? Зьмены закрануць шэраговых грамадзян, юрыдычныя асобы і прадпрымальнікаў — у іх будзе новы юрыдычны адрас, адрас будынку, ізаляванага памяшканьня ці зямельнага ўчастку. Калі гэта адбылося, трэба паправіць адрасы ў дакумэнтах. Грамадзян, ІП і юрасоб вызваляць ад мыты за папраўкі ў дакумэнты, якія ўтрымліваюць зьвесткі аб адрасе. Мыта ня будзе здымацца за выдачу дакумэнту, які пацьвярджае плату за зямельны ўчастак.