У сеціве зьявілася паведамленьне, што сёньня, на 89-м годзе жыцьця, памерла канадзкая пісьменьніца Эліс Манро, ляўрэатка Нобэлеўскай прэміі 2013 году. Навіна, як неўзабаве высьветлілася, аказалася фэйкам.
Фэйк прыпісваюць італьянскаму журналісту Тамаза Дэбэнэдэці, які раней уводзіў у зман СМІ, паведамляючы пра сьмерць Сьвятланы Алексіевіч, Фідэля Кастра ці Пэдра Альмадовара.
Эліс Манро нарадзілася ў 1931 годзе ў мястэчку Ўінгэм (канадзкая правінцыя Антарыё) у сям’і школьнай настаўніцы і фэрмэра. Сваё першае апавяданьне надрукавала ў 1950 годзе падчас навучаньня ва Ўнівэрсітэце Заходняга Антарыё.
Пісьменьніцкая слава прыйшла да Манро досыць позна, калі ёй было каля сарака гадоў. За сваё жыцьцё яна апублікавала 14 зборнікаў апавяданьняў, якія прынесьлі ёй прызнаньне крытыкі і тытул «нашага Чэхава» ў сучаснай англамоўнай літаратуры.
У 2009 Манро атрымала Букераўскую прэмію, а ў 2013 — Нобэлеўскую прэмію.
