Чатырохгадовая дзяўчынка з Зэльвенскага раёну, якую на мінулым тыдні моцна зьбіў бацька, памерла 20 кастрычніка. Інфармацыю пацьвердзілі ў Зэльвенскім сельсавеце.
Выпадак здарыўся ў мінулую пятніцу, 18 кастрычніка. Каля 23.30 у міліцыю паступіла паведамленьне з установы здароўя пра дзяўчынку 2015 году нараджэньня са шматлікімі пашкоджаньнямі і ў непрытомным стане.
Высьветлілася, што каля 20.00 18 кастрычніка бацька зьбіў дзяўчынку за тое, што яна яго не паслухалася. Мужчына трос дзіця, наносіў удары рукамі і нагамі. Затым некалькі разоў кінуў на тахту, а таксама ў сьцяну, пасьля чаго дачка страціла прытомнасьць.
Спалохаўшыся, мужчына выклікаў хуткую дапамогу, да прыезду мэдыкаў сам спрабаваў прывесьці дачку ў прытомнасьць.
Вядома, што дзяўчынка зь сястрой, якая нарадзілася ў 2016 годзе, знаходзіліся пад апекай бацькі. Дзяцей раней адбіралі з прычыны сацыяльна-небясьпечнага становішча ў сям'і, а ўвосень 2018 году вярнулі. Іхная маці пазбаўленая бацькоўскіх правоў.
Мужчына пражываў з сужыцелькай, у якой таксама ёсьць адно дзіця.
25-гадовы мужчына затрыманы. Зэльвенскім раённым аддзелам Сьледчага камітэту заведзена крымінальная справа за замах на забойства заведама малалетняй асобы.
Гэтая публікацыя падрыхтаваная пры выкарыстаньні інфармацыі БелаПАН.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў