Лінкі ўнівэрсальнага доступу

Украіна плянуе перамяшчэньне войскаў з улікам пагрозы нападу Расеі празь Беларусь


Міністар замежных справаў Украіны Вадзім Прыстайка.

Міністар замежных справаў Украіны Вадзім Прыстайка заяўляе, што ўкраінскія ўлады разам са сваімі партнэрамі з Эўрапейскага Зьвязу і NATO аналізуюць рызыкі магчымага наступу Расеі на падставе назіраньняў за перамяшчэньнем расейскіх войскаў у кірунку мяжы зь Беларусьсю.

«Мы назіраем за тым, што адбываецца. Ня толькі з нашымі партнэрамі з NATO, з Эўрапейскага Зьвязу; вядзецца дакладная праца, вядуцца спадарожнікавыя назіраньні і дзеяньні выведкі, каб зразумець, якая насамрэч існуе пагроза і чаго хочуць дасягнуць расейцы, калі праводзяць гэтыя манэўры; колькі базаў, створаных для правядзеньня вучэньняў; колькі войскаў і сілаў пасьля іх застаецца; якім чынам залучаюцца, напрыклад, падразьдзяленьні Міністэрства надзвычайных сытуацый, вайсковых чыгуначных войскаў, Міністэрства ўнутраных спраў Расеі, як яны перамяшчаюцца, як апэратыўна яны адбываюцца і на якіх участках. Гэта не застаецца бяз нашага аналізу», — заявіў Вадзім Прыстайка сёньня ў Вярхоўнай Радзе Ўкраіны, адказваючы на пытаньні дэпутатаў.


Міністар замежных справаў Украіны падкрэсьліў, што ў разьвязаньні сытуацыі на Данбасе прэзыдэнт Уладзімір Зяленскі абапіраецца на менскія дамоўленасьці, дасягнутыя пяць гадоў таму папярэдняй украінскай уладай.

«Наколькі мы адчуваем, што Расея гатова рухацца? Менавіта для гэтага прэзыдэнт Украіны Зяленскі цяпер спрабуе зрабіць усё магчымае для правядзеньня сустрэчы ў нармандзкім фармаце. Мы спадзяемся, што ў наступным месяцы такая сустрэча адбудзецца і мы станем сьведкамі гатоўнасьці рухацца па ўсіх чатырох напрамках, вызначаных менскімі дамоўленасьцямі», — дадаў Вадзім Прыстайка.

Аб падрыхтоўцы Расеі да маштабнага ўварваньня ва Ўкраіну заявіў намесьнік начальніка Генэральнага штабу Ўзброеных сілаў Украіны Аляксей Таран у апублікаваным сёньня інтэрвію аднаму з украінскіх інтэрнэт-выданьняў.

«Расея рыхтуецца да шырокай ваеннай агрэсіі. Гэтыя пляны цалкам відавочныя. Узброеныя сілы Ўкраіны адпаведна рыхтуюцца, каб адбіць яе на ўсіх межах Украіны. Гэта тычыцца ня толькі лініі сутыкненьня (на Данбасе. — РС), але і іншых раёнаў, пачынаючы ад мяжы зь Беларусьсю і далей паблізу Крыму і Бесарабіі. Сёньня ў нас ёсьць дастатковая колькасьць падрыхтаваных кіраўнічых органаў, здольных плянаваць і кіраваць войскамі ў гэтых важных раёнах», — заявіў Аляксей Таран.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG