Лінкі ўнівэрсальнага доступу

МУС: Багачову затрымлівалі, бо яна была ў міжнародным вышуку

абноўлена

Ганна Багачова

Міністэрства ўнутраных спраў Беларусі паведаміла, што грамадзянка Расеі Ганна Багачова была затрымана ў адным з гатэляў Менску, бо знаходзілася ў міжнародным вышуку.

«Ва ўстаноўленым парадку матэрыялы былі перададзеныя для вывучэньня і прыняцьця рашэньня ў пракуратуру», — паведамілі ў міністэрстве. Паводле МУС, цяпер Ганну Багачову адпусьцілі.

Абноўлена. Прэс-сакратарка Аляксандра Лукашэнкі заявіла Tut.by, што гэта было не затрыманьне, а «высьвятленьне абставінаў» праз тое, што прозьвішча Багачовай было «ў нашых базах зьвестак».

Раней паведамлялася, што Багачову затрымалі 13 кастрычніка каля 22 гадзіны ў адным зь менскіх гатэляў.

Багачова — адна з 13 расейцаў, якім выставілі абвінавачаньні пасьля расьсьледаваньня спэцпракурора ЗША Робэрта Мюлера.

Раней у амбасадзе Расеі ў Менску карэспандэнту Свабоды паведамілі, што «ўся афіцыйная інфармацыя будзе на сайце МЗС РФ ці ў сацсетках».

У афіцыйным твітэры Міністэрства замежных спраў Расеі сёньня зьявілася паведамленьне:

«Сытуацыя ў сувязі з затрыманьнем у Менску праваахоўнымі органамі Рэспублікі Беларусь грамадзянкі Расеі Ганны Багачовай знаходзіцца ва ўвазе консульскага аддзелу Пасольства Расеі ў РБ, супрацоўнікі якога аказваюць ёй прадугледжаную ў такіх выпадках консульскую падтрымку».

Прадстаўнікі прарасейскіх арганізацый у Беларусі Сяргей Лушч і Аляксандар Шпакоўскі адмовіліся камэнтаваць сытуацыю.

Намесьнік пракурора Фрунзенскага раёну Менску не знайшоў падстаў для прымяненьня адносна Багачовай меры стрыманьня ў выглядзе ўзяцьця пад варту. Багачову вызвалілі 15 кастрычніка.

«Генпракуратура паставіла пытаньне аб спыненьні міжнароднага вышуку адносна яе на тэрыторыі Беларусі», — сказалі карэспандэнту Свабоды ў Генпракуратуры РБ.

На пытаньне, ці быў запыт ЗША на затрыманьне Багачовай, у Генпракуратуры сказалі, што ў гэтым выпадку працэдура не прадугледжвае наяўнасьці запыту, таму што Багачова была ў міжнародным вышуку.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG