Лінкі ўнівэрсальнага доступу

Букераўскую прэмію падзялілі на дваіх, парушыўшы правілы


Маргарэт Этвуд (зьлева) і Бэрнардын Эварыста

Канадзкая пісьменьніца Маргарэт Этвуд зноў стала ляўрэаткай Букераўскай прэміі, але на гэты раз яна падзяліла ўзнагароду з брытанкай Бэрнардын Эварыста.

Маргарэт Этвуд атрымала ўзнагароду за раман «Запаветы» («The Testaments»). Гэта працяг яе раману «Аповед служанкі», які стаў бэстсэлерам і які лёг у аснову аднайменнага сэрыялу. Гісторыя адбываецца ў фантастычнай вэрсіі Новай Англіі ў ЗША ў блізкай будучыні — жорсткім каставым грамадзтве пад назвай Рэспубліка Гілеад, дзе да ўлады прыйшла рэлігійная расісцка-нацыяналістычная арганізацыя. Новая ўлады пачала зьмяняць грамадзтва паводле новых правілаў, заснаваных на Старым Запавеце. Гераіня кнігі — жанчына, якая спрабуе ўцячы ў Канаду.

Этвуд ўжо пяць разоў уваходзіла ў шорт-ліст прэміі, а ў 2000 годзе стала ляўрэаткай за раман «Сьляпы забойца». У беларускім перакладзе ў 2018 годзе выйшла яе кніга «Пэнэляпіяда» ў перакладзе Вольгі Калацкай. Вершы ў кнізе пераклала Марыя Мартысевіч.

Бэрнардын Эварыста ўзнагародзілі за раман «Дзяўчына, жанчына, усё астатняе»(«Girl, Woman, Other») — гэта кніга пра жыцьцё і барацьбу 12 жанчын, пераважна чарнаскурых брытанак. Аўтарка — дачка ангелькі і нігерыйца. Яе гераіні распавядаюць гісторыі сваіх сем’яў, сяброў і закаханых па ўсёй краіне на працягу многіх гадоў.

Пераможцы падзеляць прэмію ў 50 тысяч фунтаў стэрлінгаў. Паводле правілаў прэміі, уведзеных у 1992 годзе, яе нельга дзяліць, але пасьля пяці гадзін абмеркаваньня журы вырашыла парушыць правілы, бо не магло вызначыцца якая зь дзьвюх кніг лепшая.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG