Лінкі ўнівэрсальнага доступу

Першыя рэакцыі на ўварваньне Турэччыны ў Сырыю


Жанчына ідзе недалёка ад месцаў, што трапілі пад бамбаваньне турэцкімі самалётамі

У сераду Турэччына пачала ваенную апэрацыю ў паўночнай Сырыі. Аб гэтым абвясьціў турэцкі прэзыдэнт Рэджэп Эрадаган. Паведамляецца пра выбухі на мяжы і пра бамбаваньне рэгіёну турэцкімі самалётамі. Галоўная мэта апэрацыі — барацьба з тэрарыстычнай групоўкай «Ісламская дзяржава» і курдзкімі ўзброенымі фармаваньнямі ў гэтым рэгіёне.

Ніжэй мы прыводзім апублікаваныя агенцтвам Reuters першыя рэакцыі на турэцкія дзеяньні ад шэрагу афіцыйных асобаў:

Генэральны сакратар NATO

Енс Столтэнбэрг, генэральны сакратар Паўночнаатлянтычнага альянсу, сказаў, што спадзяецца, што апэрацыя будзе ўзважаная і адэкватная.

Старшыня Эўрапейскай камісіі

Жан-Клод Юнкер, старшыня Эўракамісіі, заклікае Турэччыну спыніць ваенную апэрацыю.

Ён таксама папярэдзіў, што Эўразьвяз ня будзе плаціць за «зону бясьпекі», якую Турэччына хоча ўсталяваць у рэгіёне.

Францыя

Міністар па Эўрапейскіх справах Францыі Амэлі дэ Монтшалін паведаміла, што Францыя і Вялікабрытанія арганізуюць паседжаньне Рады Бясьпекі ААН па пытаньні турэцкага ўварваньня ў Сырыю. Францыя, разам з Нямеччынай і Вялікабрытаніяй заканчваюць працаваць над сумеснай заявай з асуджэньнем турэцкай вайсковай апэрацыі.

Нямеччына

Міністар замежных спраў Нямеччыны Гайка Маас сказаў, што апэрацыя Турэччыны яшчэ больш дэстабілізуе рэгіён і ўзмоцніць «Ісламскую дзяржаву». Ён таксама заклікае Турэччыну спыніць акцыю.

Данія

Міністр замежных спраў Даніі Епэ Кофад напісаў у Твітэры: «Моцна занепакоены турэцкай ваеннай апэрацыяй у Сырыі. На мой погляд, гэта <...> няправільнае рашэньне, якое можа мець сур’ёзныя наступствы для мірных жыхароў і для барацьбы з „Ісламскай дзяржавай“. Турцыя павінна праяўляць стрыманасьць. Данія знаходзіцца ў цесным кантакце па гэтаму пытаньні са сваімі хаўрусьнікамі».

Італія

Італьянскі прэм’ер-міністар Джузэпэ Контэ заявіў, што апэрацыя нясе ў сабе пагрозу далейшай дэстабілізацыі рэгіёна і можа нашкодзіць грамадзянскаму насельніцтву паўночнай Сырыі.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG