Лінкі ўнівэрсальнага доступу

Турэччына пачала ваенную апэрацыю ў паўночнай Сырыі


Турэцкія вайскоўцы каля мяжы з Сырыяй увечары 8 кастрычніка

Пра гэта абвясьціў турэцкі прэзыдэнт Рэджэп Эрадаган. Паведамляецца пра выбухі на мяжы і пра бамбаваньне рэгіёну турэцкімі самалётамі.

Апэрацыя атрымала назву «Крыніца міру». Паводле Эрдагана, яе мэтай зьяўляецца барацьба з тэрарыстычнай групоўкай «Ісламская дзяржава» і з узброенымі фармаваньнямі курдаў у рэгіёне.

Тысячы курдаў пакідаюць рэгіён:

У ноч на 7 кастрычніка Белы дом афіцыйна абвясьціў, што ЗША выведуць свае войскі з рэгіёнаў на поўначы Сырыі, у асноўным населеных курдамі.

Прэзыдэнт ЗША Дональд Трамп напярэдадні абмеркаваў па тэлефоне плянаваную Турэччынай апэрацыю з прэзыдэнтам Турэччыны Рэджэпам Эрдаганам. Трамп пазьней у Твітэры напісаў, што для ЗША «прыйшоў час выйсьці з гэтых бясконцых войнаў» у Сырыі, «многія зь якіх племянныя», а таксама «вярнуць нашых салдат дадому».

Курдзкія фармаваньні, якія ўваходзяць у кааліцыю «Сілы дэмакратычнай Сырыі» (СДС), 7 кастрычніка абвясьцілі ўсеагульную мабілізацыю і пачалі капаць супрацьтанкавыя равы і ўзводзіць абарончыя ўмацаваньні на выпадак ўварваньня турэцкіх войскаў. Пасьля заявы Белага дому аб вывадзе амэрыканскіх войскаў у курдзкіх гарадах прайшлі шматтысячныя дэманстрацыі. Іх удзельнікі выступілі супраць уводу турэцкіх войскаў на поўнач Сырыі і правядзеньня там вайсковай апэрацыі.

Прадстаўнік СДС Мустафа Балі папярэдзіў, што курды «пачнуць паўсюдную вайну супраць турэцкай арміі, калі яна ўвойдзе ў падкантрольныя ім рэгіёны».

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG