Новы прадстаўнік Эўразьвязу ў Беларусі: «Ёсьць адно слова, якое тут мае вельмі вялікае значэньне»

Новы кіраўнік прадстаўніцтва Эўразьвязу ў Беларусі Дырк Шубэль прыбыў у Менск крыху больш за два тыдні таму. У інтэрвію БелаПАН ён расказаў, чаго чакае ЭЗ ад парлямэнцкіх выбараў у Беларусі, калі могуць быць адмененыя санкцыі і што з пагадненьнем аб спрашчэньні візавага рэжыму.

Дырк Шубэль некалькі разоў наведваў Менск у якасьці начальніка аддзелу двухбаковых адносінаў з краінамі Ўсходняга партнэрства Эўрапейскай службы зьнешніх дзеяньняў, а пошні раз — у ліпені 2018 году. Ён узначальваў дэлегацыю Эўразьвязу падчас чарговага, пятага, раунду дыялёгу «Беларусь — ЭЗ» па правах чалавека.

Асноўныя тэзісы ягонага інтэрвію

Кантакты з урадам і грамадзянскай супольнасьцю

• Сваю галоўную задачу я бачу менавіта ў далейшым паляпшэньні нашых адносін, і ня толькі з урадам, але і з усімі супольнасьцямі ў Беларусі.
• Мы знаходзімся ў кантакце з урадам, а ў бліжэйшы час я маю намер сустрэцца і зь іншымі прадстаўнікамі беларускага грамадзтва — нашымі партнэрамі з грамадзянскай супольнасьці, бізнесоўцамі, журналістамі.
• Таксама пляную наведаць усе вобласьці Беларусі.
• Такіх інтэнсіўных кантактаў паміж ЭЗ і Беларусьсю яшчэ не было за ўсю гісторыю незалежнасьці Беларусі.
• Варта згадаць супрацоўніцтва Беларусі з Эўрапейскім інвэстыцыйным банкам і тое, што зноўку наладжанае ўзаемадзеяньне дзяржаўнага сэктару з Эўрапейскім банкам рэканструкцыі і разьвіцьця.
• Вельмі важна, што мы запусьцілі праекты TWINNING. Гэта вельмі карысны і эфэктыўны інструмэнт узаемадзеяньня паміж галіновымі ведамствамі ЭЗ і трэціх краін. Ён дазваляе экспэрту зь любой краіны ЭЗ, якую абярэ бок, які прымае (у дадзеным выпадку Беларусь), прыехаць сюды і працаваць тут год, а часам і больш.
• мы працуем над падрыхтоўкай вызыту ў Менск кіраўніка эўрапейскай дыпляматыі Фэдэрыкі Магерыні.
• ГЛЯДЗІЦЕ ТАКСАМА:

  Эўразьвяз намінаваў новага кіраўніка дэлегацыі ў Беларусі

  
  Што ЭЗ зразумеў пра Беларусь

• За шматгадовы досьвед працы з краінамі вашага рэгіёну я зразумеў, што ёсьць адно слова, якое тут мае вельмі вялікае значэньне. Магчыма, нават большае, чым у нашай, больш заходняй частцы Эўропы. Гэтае слова — стабільнасьць.
• Пытаньні правоў чалавека і дэмакратыі будуць адыгрываць важную ролю і для мяне асабіста падчас працы ў Беларусі. І я без ваганьняў буду падымаць іх у час розных сустрэч. Спадзяюся, мы здолеем дамагчыся прагрэсу па гэтых пытаньнях за час маёй працы тут.

Пра выбары

• Выбары — гэта тая сфэра, дзе за апошнія гады ня быў дасягнуты дастатковы прагрэс. Неабходная ўсёабдымная рэформа выбарчага заканадаўства,
• Мы спадзяемся, прынамсі, што выбары ў лістападзе пройдуць у адпаведнасьці зь дзеючым заканадаўствам і што будуць некаторыя паляпшэньні ў параўнаньні зь мінулымі выбарамі. Мы будзем вельмі ўважліва сачыць за хадой усёй выбарчай кампаніі.

Калі ЭЗ адменіць усе санкцыі

• Для далейшага паляпшэньня нашых адносін неабходны значны прагрэс у галіне правоў чалавека, дэмакратыі і вяршэнства права. Гэта датычыцца, у прыватнасьці, свабоды сходаў, свабоды слова і СМІ і іншых. Калі мы ўбачым далейшы прагрэс у гэтых галінах, я думаю, будзе магчымая і поўная адмена санкцый.
• ГЛЯДЗІЦЕ ТАКСАМА:

  Пяты раўнд перамоваў Брусэля і Менску: ці зьявіцца ў Беларусі ўпаўнаважаны ў правах чалавека?

  
  

Пагадненьне аб спрашчэньні візавага рэжыму

• Увесну сёлета мы змаглі завяршыць перамовы па тэксьце пагадненьня. Цяпер з боку ЭЗ праходзяць унутраныя працэдуры ўзгадненьня. Праз два месяцы пасьля заключэньня дакумэнт уступіць у сілу.
• Беларусь — адзіная краіна на постсавецкай прасторы, у якой няма базавага двухбаковага пагадненьня з ЭЗ. Відавочна, настаў час, каб такое пагадненьне зьявілася.

Беларусь-Расея

• Мы зацікаўленыя ў тым, каб у Беларусі былі добрыя адносіны ў тым ліку і з Расейскай Фэдэрацыяй. І мы таксама хацелі б разьвіваць нашы адносіны зь Беларусьсю ў адпаведнасьці з нашым бачаньнем.

Будучыя супольныя праекты з ЭЗ

• Неўзабаве ЭЗ уступае ў новы фінансавы цыкль (бюджэтны пэрыяд). Гэта адбудзецца ў 2021 годзе. Калегі з Брусэлю, якія займаюцца пытаньнямі Беларусі і краін Усходняга партнэрства, неўзабаве плянуюць прыехаць сюды, каб абмеркаваць зь беларускімі ўладамі і ўсімі зацікаўленымі бакамі прыярытэты на наступны фінансавы цыкль, якія мы зможам дапрацаваць на працягу наступнага году.
• ГЛЯДЗІЦЕ ТАКСАМА:

  Брусэль забыўся на беларускую апазыцыю

Прадстаўнік Нямеччыны Дырк Шубэль быў прызначаны новым кіраўніком прадстаўніцтва ЭЗ у Беларусі ў ліпені і прыбыў у Менск 8 верасьня.

Яго папярэдніца Андрэа Віктарын, таксама зь Нямеччыны, узначальвала прадстаўніцтва ЭЗ у Беларусі ад верасьня 2015 году па сёлетні жнівень. Яе новая пасада — пасол Эўразьвязу ў Армэніі.