Лінкі ўнівэрсальнага доступу

Tut.by: У школах зрабілі стражэйшымі правілы карыстаньня тэлефонамі


Ілюстрацыйнае фота ©Shutterstock

Паводле Tut.by, 19 верасьня ў менскіх школах дзецям паведамілі, што цяпер фота- і відэаздымкі ў школах забароненыя, а на пачатку дня вучні будуць здаваць тэлефоны кляснаму кіраўніку. У Міністэрстве адукацыі сказалі, што забарону на тэлефоны ўвялі ў сакавіку, але ня ўсе яе выконвалі.

Што адбылося?

Адразу некалькі бацькоў паведамілі Tut.by, што навучальны дзень 19 верасьня ў школах пачаўся з забароны мабільных тэлефонаў. Кожная ўстанова вырашае для сябе, якім чынам абмежаваць школьнікаў:

  • у адных школах забіраюць тэлефоны толькі на ўроках;
  • у іншых — перад першым урокам і аддаюць пасьля заняткаў.

У дакумэнце, які павінны падпісаць дзеці, пазначана, што тэлефонам можна карыстацца толькі ў надзвычайным выпадку, увесь час урокаў тэлефон знаходзіцца ў кляснага кіраўніка.

Што кажуць у Міністэрстве адукацыі?

Прэс-сакратарка Міністэрства адукацыі Людміла Высоцкая сказала, што адпаведны загад выдалі яшчэ ў сакавіку, аднак не паўсюль ён выконваецца.

Паводле Высоцкай, перад пачаткам уроку дзеці павінны пакідаць тэлефоны ў скрынках, але могуць імі карыстацца, калі гэта неабходна для навучаньня.

Што важна ведаць пра канфлікт вакол «настаўніцы з партай»

З чаго ўсё пачалося

Гомельскае выданьне «Сильные новости» апублікавала 13 верасьня відэа, зьнятае вучнямі мясцовай школы №15: настаўніца замахваецца партай на вучня і абражае яго. У прыватнасьці, настаўніца кажа: «Я ў турму пайду, а табе *** [гамон] будзе».

Настаўніца на відэа — Людміла Чацьвярткова. Яна працавала ў школе 35 гадоў і неўзабаве мела выйсьці на пэнсію. Звычайна яна выкладала ў 2 клясе, у 4 кляс у дзень інцыдэнту трапіла на замену. Сьцьвярджаецца, што яна пасьля здарэньня напісала тлумачальную і прызнавала свае дзеяньні няправільнымі.

Настаўніцу спачатку звольнілі

Вечарам 13 верасьня ў школе прайшоў бацькоўскі сход, на якім былі намесьнік старшыні гарвыканкаму Віталь Атаманчук, начальнік упраўленьня адукацыі Сяргей Парошын і іншыя чыноўнікі.

Настаўніца Людміла Чацьвярткова
Настаўніца Людміла Чацьвярткова

На сходзе Парошын патлумачыў бацькам сытуацыю, папрасіў прабачэньня і абвясьціў, што настаўніца звольненая.

Як адрэагавалі бацькі

Бацька 9-гадовага школьніка, на якога кідалася з партай настаўніца, казаў, што абураны рэакцыяй дарослых, якія вінавацяць яго сына ў інцыдэнце. Ён падкрэсьліў, што ягоны сын ня ставіў настаўніцы падножку: гэта вэрсія карыстальнікаў інтэрнэту.

Адзін з бацькоў вучняў школы №15 расказваў, што Чацьвярткова нібыта парвала вуха ягонаму сыну, калі той вучыўся ў першым клясе, і што рэгулярна прыніжала дзяцей і чыніла гвалт адносна іх.

19 верасьня каля 30 бацькоў выйшлі на стыхійны сход да школы, але на перамовах з чыноўнікамі не дамагліся аднаўленьня яе на працы. Бацькі вырашылі зьбіраць подпісы пад пэтыцыяй за вяртаньне дырэктаркі.

Лукашэнка загадаў вярнуць настаўніцу

18 верасьня стала вядома, што Аляксандар Лукашэнка даручыў аднавіць на працы настаўніцу Чацьвярткову і звольніць дырэктарку школы. Міністра адукацыі Ігара Карпенку папярэдзілі аб няпоўнай службовай адпаведнасьці, «строга папярэдзілі» прэм’ер-міністра, кіраўніцу Адміністрацыі прэзыдэнта і віцэ-прэм’ера, адказнага за адукацыю.

19 верасьня Лукашэнка публічна выказаўся ў падтрымку настаўніцы: маўляў, на яе месцы «галаву б адкруціў шчанюку». Таксама ён заявіў, што са зьдзекаў з настаўнікаў пачынаюцца трагедыі, як у Стоўпцах. Чыноўнікаў ён раскрытыкаваў за тое, што яны «абсікаліся, што іх, бачыце, у сацыяльных сетках разьмясьцілі».

Міліцыя распачала праверку

У сувязі з інцыдэнтам міліцыянты распачалі праверку ў межах адміністрацыйнага заканадаўства, апытвалі ўсіх удзельнікаў канфлікту, у тым ліку сьведак-дзяцей пры ўдзеле бацькоў, а таксама хлопца, на якога настаўніца замахвалася партай, і ягонага бацьку.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG