Дзяржаўны дэпартамэнт ЗША апублікаваў кароткі анонс візыту ў Беларусь намесьніка дзяржаўнага сакратара Дэвіда Гэйла. У анонсе адзначаецца, што ён будзе ў Менску 17 і 18 верасьня, сустрэнецца з высокапастаўленымі беларускімі чыноўнікамі і лідэрамі грамадзянскай супольнасьці.
Іншых падрабязнасьцяў Дзяржаўны дэпартамэнт не публікуе.
Раней Міністэрства замежных справаў Беларусі паведаміла, што ў Дэвіда Гэйла заплянаваныя перамовы зь міністрам Уладзімерам Макеем. З кім яшчэ мае сустрэцца Гэйл, не паведамляецца.
А нядаўна быў Болтан
29 жніўня Беларусь наведаў дарадца прэзыдэнта ЗША ў нацыянальнай бясьпецы Джон Болтан — самы высокапастаўлены прадстаўнік амэрыканскіх уладаў з усіх, якія пабывалі ў краіне за апошнія 20 гадоў.
Болтан сустрэўся з Аляксандрам Лукашэнкам і падчас сустрэчы заявіў, што Вашынгтон спадзяецца знайсьці агульную мову зь Менскам у пытаньнях выкананьня правоў чалавека і нераспаўсюджаньня зброі. Аляксандар Лукашэнка адзначыў, што Беларусь заўсёды выступала за нармалізацыю дачыненьняў з ЗША і хоча пачаць з чыстага аркуша.
Неўзабаве Болтан у Варшаве сустрэўся з сакратаром Савету бясьпекі Беларусі. Той пасьля сустрэчы казаў, што яны «не плялі інтрыг», а Беларусь застаецца саюзьніцай Расеі.
Беларускія ўлады некалькі разоў прасілі «ня строіць кансьпіралягічных тэорыяў» наконт сустрэч з Болтанам. Празь менш як два тыдні пасьля візыту прэзыдэнт ЗША Дональд Трамп звольніў Болтана.