Сакратар Рады бясьпекі Расеі, былы дырэктар ФСБ Мікалай Патрушаў наведаў Беларусь 10 верасьня. Спачатку была анансаваная толькі яго сустрэча зь беларускім калегам Станіславам Засем, але, як піша БелТА, Патрушаў сустрэўся і з Аляксандрам Лукашэнкам.
Аляксандар Лукашэнка заявіў, што мае шэраг пытаньняў, важных для беларуска-расейскіх дачыненьняў, якія хоча абмеркаваць зь Мікалаем Патрушавым, асобна адзначыў нядаўнюю сустрэчу прэм’ер-міністраў Беларусі і Расеі і перамовы пра «саюзную дзяржаву». Таксама Лукашэнка адзначыў, што ў візыце няма «ніякай надзвычайшчыны», хоць «некаторыя СМІ» (якія, не сказаў) «займаюцца кансьпіралёгіяй».
«Надзвычайшчыны быць ня можа, бо, нягледзячы на шэраг пытаньняў, нават адчувальных, дай божа, каб іншыя дзяржавы мелі адзін з адным такія стасункі, якія маюць сёньня Беларусь і Расея, — адзначыў Лукашэнка. — Таму тут ніякай кансьпіралёгіі нават быць не можа».
У час сустрэчы Лукашэнка перадаў Патрушаву «памятны падарунак, зьвязаны са службай на тэрыторыі Беларусі ў часы СССР (ён быў слухачом «вышэйшых курсаў» КДБ у Менску ў 1974–75 гадах):
«Я разумею, што вы шануеце тыя гады, — сказаў Лукашэнка, калі перадаў Патрушаву дасье на яго ад КДБ. — Адрасы, паролі, яўкі — усё тут. Але дзіўна: касякоў ніякіх не заўважана ў тыя гады, таму і сталі вялікім чалавекам. Думаю, вам прыемна будзе ўспомніць тыя гады».
Патрушаў пацьвердзіў: у ягоным візыце «нічога звышнатуральнага няма», праца радаў бясьпекі ідзе «на плянавай аснове».
«Мы зь ім пагаварылі аб пытаньнях стратэгічнай стабільнасьці, пра тыя зьмены, што адбываюцца ў міжнароднай і рэгіянальнай бясьпецы, як іх трэба ўлічваць, якія новыя выклікі і пагрозы і які ўплыў яны аказваюць, як трэба рэагаваць на тыя дзеяньні, якія чыняць нашы партнэры», — расказаў Патрушаў пра сустрэчу з Лукашэнкам.
Патрушаў згадаў спыненьне дзеяньня Дамовы аб ракетах сярэдняй і малой далёкасьці паміж Расеяй і ЗША. Ён заявіў, што ЗША «перадусім бачаць праціўнікам Кітай», але дадаў, што амэрыканскія ракеты з Польшчы і Румыніі «дастаюць нашую тэрыторыю». Таксама ён падтрымаў прапанову Лукашэнкі падпісаць дамову аб неразьмяшчэньні ракетаў сярэдняй і меншай далёкасьці ў Эўрапейскім рэгіёне.
У Патрушава пасьля сустрэчы з Лукашэнкам заплянаваная і сустрэча зь беларускім калегам — дзяржаўным сакратаром Рады бясьпекі Беларусі Станіславам Засем.
Да таго Зась казаў журналістам, што сустрэча «ні ў якім разе не зьвязаная зь нейкімі міжнароднымі падзеямі», але абмяркоўваць будуць і пытаньні, якія «карэлююць» з «тым, што абмяркоўвалася ў Варшаве» — там, дзе ён сустракаўся з дарадцам прэзыдэнта ЗША ў нацыянальнай бясьпецы Джонам Болтанам.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў