У 2017 годзе ЗША вывезьлі з Расеі свайго агента, які меў доступ да высокапастаўленых крыніц ва ўрадзе. Першым пра гэта паведаміў тэлеканал CNN, але пазьней гэтую інфармацыю пацьвердзілі некалькі іншых амэрыканскіх СМІ.
Згодна з CNN, інфарматар быў часткай інфраструктуры нацыянальнай бясьпекі. Ён нібыта меў доступ да прэзыдэнта Ўладзіміра Пуціна і нават мог даць фатаграфіі дакумэнтаў зь ягонага стала. Тэлеканал «Настоящее время» сабраў інфармацыю пра магчымага агента.
Што ведаў гэты чалавек
Інфарматар меў ключавыя доказы таго, што Пуцін асабіста загадаў ўмяшацца ў перадвыбарчую кампанію 2016 года ў ЗША, паведамляе выданьне The New York Times.
Інфарматар таксама нібыта паведаміў ЦРУ пра тое, што Пуціну падабаўся тады яшчэ кандыдат у прэзыдэнты Дональд Трамп і што расійскі прэзыдэнт асабіста загадаў ўзламаць сэрвэры Нацыянальнага камітэту партыі дэмакратаў, канкурэнтаў Трампа.
Чаму ЗША вывезьлі інфарматара з Расеі
Крыніцы распавялі журналістам, што супрацоўнікі амэрыканскіх спэцслужбаў перажывалі праз тое, як неакуратна прэзыдэнт Дональд Трамп і ягоная адміністрацыя ставяцца да сакрэтнай інфармацыі. Яны баяліся, што гэта можа паставіць у небясьпеку інфарматара ў Расеі.
Рашэньне пра яго вываз з краіны, паведамляе CNN, было прынята пасьля таго, як Трамп падзяліўся сакрэтнай інфармацыяй зь міністрам замежных спраў Расеі Сяргеем Лаўровым і расейскім паслом у ЗША Сяргеем Кісьляком на сустрэчы ў Белым доме ў 2017 годзе.
Спэцслужбы нібыта баяліся, што Трамп можа перадаць Расеі інфармацыю, якая б выдала іх агента.
Акрамя таго, у спэцслужбах пабойваліся, што інфарматар мог стаць падвойным агентам. Ён адмовіўся зьяжджаць з Расеі, калі яму прапанавалі гэта першы раз.
Кім мог быць выведнік
Расейскі Тэлеграм-канал «Беспощадный пиарщик» назваў інфарматарам ЗША супрацоўніка адміністрацыі прэзыдэнта Расеі. У 2017 годзе ён з жонкай і трыма дзецьмі зьехаў у адпачынак у Чарнагорыю і зьнік. Пазьней па гэтым факце пачалі справу па артыкуле «Забойства», яна дагэтуль не закрытая.
Паводле дадзеных расейскага выданьня «Коммерсант», сьледзтва выявіла, што чыноўнік і ягоная сям’я жывыя і жывуць у іншай краіне. Газэта паведамляе, што муж і жонка, чые імёны супадаюць з імёнамі, названымі ў СМІ, у 2018 годзе купілі дом у горадзе Стафард, штат Вірджынія.
Амэрыканскі тэлеканал NBC News пацьвярджае, што былы інфарматар жыве ў гэтым рэгіёне пад сапраўдным імем. Журналісты тэлеканалу пабывалі каля дому былога агента, але былі затрыманыя ахоўнікамі, якія прадставіліся сябрамі людзей, якія пражываюць у доме.
Як доўга ён працаваў на ЗША
CNN паведамляе, што гэты чалавек быў інфарматарам больш за 10 гадоў, але The New York Times піша пра «дзесяцігодзьдзі».
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў