Лінкі ўнівэрсальнага доступу

Зноў адкрываецца эпатажная сядзіба пад Наваградкам, стваральнік якой таямніча памёр


Сядзіба Літоўка пад Наваградкам, архіўнае фота

Фэнтэзійная сядзіба Літоўка пад Наваградкам расчыніць дзьверы для наведнікаў з 22 жніўня.

Уваход у сядзібу зробяць платным: для дарослых 4 рублі, для дзяцей да 10 гадоў — 2 рублі. Пра гэта паведамляецца ў акаўнце сядзібы ў Instagram. Вызначаны графік працы — з 12:00 да 21:00.

«Плянаў на далейшае разьвіцьцё шмат, хацелася б увасобіць у рэальнасьць усё, што задумаў Сяргей (Коваль — заснавальнік сядзібы. — РС), — гаворыцца ў допісе ў акаўнце Літоўкі. — Але на гэта патрэбны час і сродкі. Таму шчыра спадзяёмся на разуменьне, што ня будзе абурэньня, што ўваход цяпер платны... Месца ранейшым, вядома, ужо ня будзе, але я паспрабую зрабіць усё магчымае для яго адраджэньня, каб тата мной ганарыўся!»

Выглядае, што справамі сядзібы будзе займацца старэйшая дачка стваральніка сядзібы Сяргея Коваля Кацярына.

Сяргей Коваль. архіўнае фота, лістапад 2018 году
Сяргей Коваль. архіўнае фота, лістапад 2018 году

47-гадовы Сяргей Коваль павесіўся 1 студзеня паміж 13 і 15 гадзінай у сваёй кватэры. Ён задумваў комплекс як тэрыторыю, адкрытую для ўсіх у любы час, бясплатна. Праўда, незадоўга да сьмерці, бізнэсовец сумняваўся, ці не зрабіў у такім рашэньні памылку.

Асаблівасьцю сядзібы стала сумяшчэньне ў адным месцы сымбаляў і знакаў розных культураў і рэлігій. Яе працягвалі дабудоўваць. Праект меўся быць бясконцым.

Незвычайны арт-аб’ект прыцягваў шматлікіх турыстаў зь Беларусі і ня толькі. За выходныя тэрыторыю Літоўкі наведвалі 3–4 тысячы чалавек.

Сядзіба закрылася у лістападзе 2018 году, пасьля таго як на тэрыторыі Літоўкі затрымалі «эпіскапа сьвету» Дзьмітрыя Бондара.

Коваль тады адмаўляў сувязь паміж гэтымі падзеямі. У той жа пэрыяд на дзейнасьць сядзібы пачалі скардзіцца некаторыя жыхары Наваградку, бо ўбачылі там прыкметы сатанізму і распусты. Сяргей вырашыў зрабіць перапынак у дзейнасьці сядзібы. Ён прызнаваўся, што ўсе гэтыя падзеі яго прыгнятаюць.

Літоўка
Літоўка

Коваль быў вядомы ў горадзе і як мэцэнат: паставіў на тэрыторыі былога гета помнік габрэйскай дзяўчынцы Міхле Сасноўскай. Плянаваў усталяваць помнік беларускай сям’і, якая хавала ў сябе габрэяў падчас вайны.

Сяргей Коваль у лістападзе 2018 году
Сяргей Коваль у лістападзе 2018 году

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG