Лінкі ўнівэрсальнага доступу

Аддаць 883 тысячы аўтазакаў, ахоўваць 2 мільёны мітынгаў. Як Беларусі вярнуць доўг Расеі


Беларусь вінаватая Расеі 7,6 мільярда даляраў што робіць яе найбуйнейшым даўжніком гэтай краіны. Такія зьвесткі падае Мінфін Расеі. Глядзім, як можна аддаць доўг натурпрадуктам.

660 мільёнаў мяхоў бульбы

На сустрэчу з Уладзімірам Пуціным у сьнежні мінулага году Аляксандар Лукашэнка прывёз бульбу са свайго агароду. У кадар тады трапілі адразу чатыры вялікія мяхі. Каб вярнуць 7,6 мільярда, трэба 660 мільёнаў такіх мяхоў — калі лічыць па сярэднім кошце на рынку.

950 тысяч тон крэвэтак

У 2014 годзе сацыяльныя сеткі і СМІ зьвярнулі ўвагу на беларускія крэвэткі на паліцах расейскіх крамаў. Гэта выклікала сэрыю жартаў і кпінаў. Беларусь сапраўды пастаўляе крэвэткі ў Расею. І каб пакрыць доўг, такіх крэвэтак трэба 950 тысяч тон, у пераліку на сярэдні кошт па экспартнай статыстыцы Белстату.

524 тысяч трактароў

Пра забітыя трактарамі склады ў Беларусі вядома даўно. Прадукцыю робяць, але пастаўляць усё не пасьпяваюць. Летась Беларусь прадала за мяжу 40 242 трактары. Сярэдні кошт — 14 493 даляры. Каб пакрыць доўг, у Расею давядзецца адгрузіць 524 тысячы трактароў па сярэднім, згодна зь Белстатам, экспартным кошце.

Трактары МТЗ на парадзе 3 ліпеня 2017 году
Трактары МТЗ на парадзе 3 ліпеня 2017 году

27 мільёнаў тон яблыкаў

Беларускія яблыкі — адзін з аб’ектаў пільнага кантролю з боку расейскага Рассельгаснагляду. Гэты прадукт рэгулярна трапляе ў прыгоды на мяжы з прычыны рээкспарту. Каб вярнуць доўг, Беларусі трэба паставіць 27 мільёнаў тон яблыкаў, згодна з экспартным коштам яблыкаў паводле Белстату.

883 тысячы ўжываных аўтазакаў

Аўтазак стаў адным з брэндаў Беларусі: на паліцах сувэнірных крамаў даўно зьявіліся невялікія драўляныя аўтазакі зялёнага колеру. У 2017 годзе менская міліцыя прадавала ўжываны аўтазак за 16,5 тысячы рублёў. Усяго 883 тысячы такіх аўтазакаў — і доўгу як не было.

Папрацаваць на 2,2 мільёна мітынгаў

Паслугі беларускай міліцыі за ахову аднаго мітынгу больш як на 1000 чалавек каштуюць 250 базавых велічыняў. Якраз у Расеі цяпер ідуць мітынгі пратэсту ў сувязі з выбарамі ў Маскоўскую гарадзкую думу. Калі такіх мітынгаў будзе 2,2 мільёна і беларуская міліцыя возьме падрад на іх ахову — доўг у 7,6 мільярда будзе пагашаны.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG