Лінкі ўнівэрсальнага доступу

Лукашэнку запрасілі на Валаам, каб паказаць будучыню інтэграванай Беларусі, — расейскі філёзаф


Манумэнт «Дрэва сяброўства» ў Петразаводзку
Манумэнт «Дрэва сяброўства» ў Петразаводзку

Расейскі філёзаф Максім Гаруноў разважае пра цяперашні візыт Ўладзімера Пуціна і Аляксандра Лукашэнкі на Валаам.

Сьцісла:

  • Цяпер Карэлія ўяўляе сабой прыклад поўнай інтэграцыі ў «рускі сьвет»
  • Карэлія — адзіная аўтаномная рэспубліка Расейскай Фэдэрацыі, у якой дзяржаўнай мовай зьяўляецца толькі расейская
  • Калі Беларусь трапіць у склад РФ, то яе будучыня там — карэльская
Максім Гаруноў
Максім Гаруноў

Чаму Пуцін запрасіў Лукашэнку на Валаам? Так, гэта манастыр, але ён месьціцца ў Карэльскай рэспубліцы. Калісьці Карэлія мела статус саюзнай рэспублікі, роўны статусу Беларускай ССР. У 1956 гэты статус быў скасаваны. Цяпер Карэлія гэта прыклад поўнай інтэграцыі ў «рускі сьвет». На карэльскай мове там практычна ніхто не гаворыць. Паводле апошняга перапісу толькі 11% жыхароў Карэліі адказалі, што неяк асацыююць сябе з карэламі. На карэльскай мове гаворыць яшчэ менш людзей — некалькі дзясяткаў тысячаў.

Уладзімір Пуцін на апошняй прэсавай канфэрэнцыі сам выбраў пытаньне — Куды падзелася чудзь? Гэта было такое вугра-фінскае племя. Пуцін адказаў — яна растварылася.

Пуцін запрашае Лукашэнку, кіраўніка незалежнай дзяржавы, якую зьбіраюцца інтэграваць, наведаць самую інтэграваную, самую ўцягнутую ў «рускі сьвет», нацыянальную рэспубліку РФ.

Карэлія — адзіная аўтаномная рэспубліка Расейскай Фэдэрацыі, у якой дзяржаўнай мовай зьяўляецца толькі расейская, а карэльская — мовай, якая мае дзяржаўную падтрымку. Вы прыяжджаеце ў Татарстан, і там татарская дзяржаўная. А ў Карэліі карэльская — не.

Лукашэнка яшчэ не да канца інтэграваны. Яго запрашаюць, маўляў, паглядзі — прыкладна так і з Беларусьсю будзе.

Калі Беларусь трапіць у склад РФ, то будучыня яе там — карэльская.

Калі мы прыгадаем пазыцыю Аляксандра Рыгоравіча наконт беларускай мовы і параўнаем з пазыцыяй кіраўніцтва Карэліі адносна карэльскай і астатніх мясцовых моваў, то ўбачым, што яны вельмі падобныя.

Цікава, што Беларусь, калі ўвойдзе ў склад РФ, то апынецца ў становішчы, падобным на становішча Карэліі, яшчэ паводле аднаго чыньніку.

У Карэліі мяжа з Фінляндыяй, фіны і карэлы — роднасныя народы, у іх блізкія мовы. Ёсьць тэорыя, што фін адрозьніваецца ад карэла толькі веравызнаньнем, карэл — гэта праваслаўны фін, а фін — гэта лютэранскі карэл.

Беларусы ў РФ апынуцца ў падобным становішчы зь мяжой з Польшчай. Польшча для беларусаў будзе тым жа, чым Фінляндыя — для карэлаў.

Калі цікава, якой будзе будучыня Беларусі ў складзе Расеі — паглядзіце на Карэлію. Менск стане як Петразаводск. Азнаёмцеся, Аляксандар Рыгоравіч.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG