Лінкі ўнівэрсальнага доступу

ЗША і Расея правядуць перамовы аб новай ядзернай дамове


Прэзыдэнт ЗША Дональд Трамп аб’яўляе дэнансацыю Дамовы аб зьнішчэньні ракет сярэдняй і меншай далёкасьці з прычыны яе парушэньня Расеяй. 20 кастрычніка 2018 году

Прадстаўнікі ЗША і Расеі сустрэнуцца 17 ліпеня ў Жэнэве з мэтай ацаніць пэрспэктывы заключэньня новай дамовы аб абмежаваньні ядзерных узбраеньняў, —​ пагадненьня, да якога пасьля зможа далучыцца Кітай, паведамляе Reuters са спасылкай на высокапастаўленага прадстаўніка адміністрацыі Дональда Трампа.

Белы дом спадзяецца, што ў выніку перамоваў на ўзроўні намесьнікаў міністраў замежных спраў зьявіцца большая яснасьць наконт намераў Крамля і поглядаў расейскага кіраўніцтва на магчымасьць заключэньня трохбаковага пагадненьня аб абмежаваньні ядзерных арсэналаў з удзелам Кітаю.

Аб пажаданасьці такой дамовы, якой бы рэгуляваліся ўсе тыпы ядзернай зброі, неаднаразова казаў прэзыдэнт ЗША Дональд Трамп. Ён уздымаў гэтае пытаньне падчас сустрэч з Уладзімірам Пуціным і Сі Цзіньпінам падчас саміту G20 у Осацы ў чэрвені.

Паводле крыніцы агенцтва Reuters у Белым доме, на сустрэчы ў Жэнэве не плянуецца абмяркоўваць Дамову аб забароне ракет сярэдняй і меншай далёкасьці, у парушэньні якой ЗША абвінавацілі Расею і якая была дэнансаваная Вашынгтонам.

Амэрыканская дэлегацыя не плянуе і абмяркоўваць падаўжэньне дамовы СНВ-3 (паміж Расеяй і ЗША наконт далейшага ўзаемнага скарачэньня арсэналаў разгорнутых стратэгічных ядзерных узбраеньняў, падпісаная Мядзьведзевым і Абамам 8 красавіка 2010 году ў Празе), дзеяньне якой спыняецца ў лютым 2021 году. Прэзыдэнт Трамп, паводле яго, робіць стаўку на дамову «новага пакаленьня» з удзелам трох краінаў.

Што важна ведаць пра дамову аб ліквідацыі РСМД

ЗША 2 лютага пачалі выходзіць з Дамовы аб ліквідацыі РСМД. У адказ на гэта Ўладзімір Пуцін 2 лютага заявіў, што Расея прыпыняе ўдзел у дамове.

  • Вашынгтон сьцьвярджае, што Масква парушыла дамову аб РСМД, стварыўшы і разгарнуўшы ракетную сыстэму 9М729. Цяпер Расея валодае 100 такімі ракетамі.
  • Масква абвяргае ўсе абвінавачаньні, заяўляючы, што далёкасьць палёту ракеты 9М729 складае 480 кілямэтраў, што на 20 кілямэтраў менш за ніжнюю мяжу, вызначаную дамовай.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG