Лінкі ўнівэрсальнага доступу

Менск не рыхтаваўся прымаць турыстаў з інваліднасьцю на Эўрапейскіх гульнях, — экспэрт


Менск ніяк не рыхтаваўся да II Эўрапейскіх гульняў з пункту гледжаньня даступнасьці аб’ектаў, заявіў кіраўнік асьветніцкай праваабарончай установы «Офіс па правах людзей з інваліднасьцю» Сяргей Драздоўскі, паведамляе БелаПАН.

Сяргей Драздоўскі, архіўнае фота
Сяргей Драздоўскі, архіўнае фота

Паводле яго, маніторынг даступнасьці гарадзкой вольнай прасторы для людзей з інваліднасьцю да і падчас правядзеньня ў сталіцы міжнароднага спартыўнага форуму выявіў мноства недахопаў.

«Горад і не зьбіраўся рыхтавацца да таго, што ў ім зьявяцца турысты, больш патрабавальныя, чым беларусы. Гарадзкія ўлады гэтаму ніякай увагі не аддалі», — сказаў Драздоўскі.

Сяргей Драздоўскі адзначыў, што ў Беларусі робіцца шмат для забесьпячэньня даступнасьці гарадзкога асяродзьдзя: паніжаюць бардзюры, будуюць пандусы, кладуць тактыльную плітку. Аднак, на яго думку, пры арганізацыі фан-зонаў, зонаў адпачынку падчас гульняў даступнасьць, бывае, парушаецца.

Драздоўскі прывёў у якасьці прыкладу кораб для правадоў і кабэлю, які інвалідны вазок ня можа пераехаць.

На інвалідным вазку цяжка пераехаць корабы для кабэляў
На інвалідным вазку цяжка пераехаць корабы для кабэляў

Недасяжнымі для людзей з інваліднасьцю былі летнія вэранды і кавярні. Драздоўскі падкрэсьліў, што не была гатовая да кантактаў і ўзаемадзеяньняў зь людзьмі з інваліднасьцю і інфармацыйная служба.

Кіраўнік офіса адзначыў, што гатэльны фонд сталіцы зрабіўся больш даступны за пяць гадоў, якія прайшлі з часу папярэдняга маніторынгу — перад чэмпіянатам сьвету па хакеі 2014 году. Павялічылася колькасьць адмыслова абсталяваных нумароў. Аднак ёсьць гатэлі, у якіх такія нумары не адпавядаюць стандартам даступнасьці для людзей з інваліднасьцю.

Хостэлы ж як былі недаступныя, так і застаюцца, канстатаваў Драздоўскі.

Зьвярнуў ён увагу і на поўную недаступнасьць для людзей з інваліднасьцю некаторых культурных абʼектаў, у прыватнасьці, Нацыянальнага мастацкага музэю. Прыбудаваны да ўваходнай лесьвіцы пандус Драздоўскі назваў «карыкатурай, пародыяй і зьдзекам са здаровага сэнсу».

У цэлым кіраўнік «Офіса па правах людзей з інваліднасьцю» адзначыў пазытыўны вопыт сумеснай працы пры падрыхтоўцы Менску да Эўрапейскіх гульняў з дырэкцыяй форуму і нэгатыўны — зь Менгарвыканкамам і Міністэрствам спорту і турызму.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG