У Пухавіцкім раёне працягваюць галадоўку актывісткі руху «Маці 328». Да іх далучылася яшчэ адна галадоўніца — Ларыса Жыгар.
З 11 чэрвеня ў Пухавікім раёне галадаюць актывісткі руху «Маці 328». 22 чэрвеня да іх далучылася яшчэ адна актывістка Ларыса Жыгар, паведамляе БелаПАН.
«Як і мы, яна настроена галадаць да канца. Паехаў ад Стас Цыбінскі, які некалькі дзён падтрымліваў нас у галадоўцы. Яму трэба на працу, акрамя таго ён ужо страчваў прытомнасьць і лекары параілі яму выйсьці з галадоўкі. Яшчэ адна з маці, Сьвятлана Віткоўская, якая галадала з намі тры дні, учора зьехала дадому ў Берасьце», — паведаміла актывістка руху «Маці 328» Ала Берналь.
Цяпер галадоўку трымаюць чацьвёра чалавек. Чакаецца, што ў бліжэйшыя дні да іх далучыцца яшчэ некалькі сваякоў асуджаных па «наркатычным» артыкуле 328.
«Сёньня раніцай да нас зноў прыяжджалі дактары, памералі ціск — ён, вядома, падае. Наша Людміла Кулініч адмовілася ад шпіталізацыі ў пісьмовай форме», — адзначыла актывістка.
21 чэрвеня ў вёсцы Востраў Пухавіцкага раёну мясцовыя міліцыянты затрымалі ўдзельніцу галадоўкі «Маці 328» Сьвятлану Віткоўскую. Жанчыну трымалі ў Сьвіслацкім аддзяленьні міліцыі больш за 4 гадзіны, потым жанчыну адпусьцілі.
Што важна ведаць пра галадоўку «Маці 328»
11 чэрвеня актывісткі руху «Маці 328», дзеці якіх адбываюць пакараньне паводле наркатычнага артыкулу, абвясьцілі галадоўку.
Удзельнікі галадоўкі патрабуюць
- Сустрэчы з Аляксандрам Лукашэнкам;
- Гуманізацыі антынаркатычнага заканадаўства;
- Перагляду спраў па 328-м артыкуле;
- Прыбраць з закону паняцьце «асабліва небясьпечныя наркотыкі»:
- Адстаўкі старшыні Вярхоўнага суду Валянціна Сукалы;
- Амністыі для непаўналетніх;
- Роспуску Палаты прадстаўнікоў Нацыянальнага cходу.
13 чэрвеня 2019 года Палата Прадстаўнікоў у другім чытаньні прыняла папраўкі ў артыкул 328. Мінімальны тэрмін пазбаўленьня волі за незаконнае абарачэньне наркотыкаў зьменшылі на 2 гады.
У красавіку-траўні 2018 годe актывісткі «Маці 328» правялі 15-дзённую галадоўку ў Калінкавічах на Гомельшчыне і ў Пухавіцкім раёне на Меншчыне, а таксама 10-дзённую галадоўку ў Лідзе. Удзельнікі галадоўкі патрабавалі перагляду жорсткіх прысудаў, якія выносіліся ад 2013 году паводле 328 артыкулу (ад 5 да 25 гадоў пазбаўленьня волі), а таксама зьменаў у заканадаўства.
